Brazil-in Japan an ngam lo

November 14, Inrinni khan Japan leh Brazil an inkhel a, Carlo Ancelotti enkawl Brazil hian 3-2 in Japan an ngam lo - coach tawnhriat nei ṭha Ancelotti hi red card pek a ni a, Raphinha pawh hun pek belhah hnawhchhuah a ni bawk!

Japan hian goal an khung hma ang reng a, Takefusa Kubo leh Keito Nakamura ten minute 19 chhungin goal khat ve ve an khung hman - Brazil tan Vinicius Jr chuan goal hnih khungin, si phurh a sut zo a, 2-2 in an inhnehtawk dawn niin a lang hman.

Mahse, hun pek belh minute khatnaah Tatsuhiro Sakamoto chuan goal khat khung lehin, 3-2 in Japan an chak ta daih - Coventry City winger Sakamoto goal khung danah Brazil an lawm lo a, buaina tenau a chhuak.

Japan-in an goal thumna an khung hian midfielder Joao Gomes lakah an foul niin Brazil hian an ngai a, mahse, referee-in a ham si lo. Ancelotti leh Raphinha an lungawi lo fal a, red card pek an ni.

Ancelotti chuan, "Referee khan ka player-te zawng zawng chu khelmualah an awm nia sawiin, ka player-te ka thunun loh avangin red card min pe. A inkhel enkawl dan avangin beisei ang result kan neih loh phah a, mahse, a thiam loh a ni lo - high level match enkawl turin a tawnhriat a la tam tawk lo a ni," a ti!

Brazil leh Japan inkhel enkawltu hi Singaporean referee Jansen Foo a ni a, tun hi international friendly match a enkawl vawi khatna chiah niin, Asia khawmualpuia inelna sang Asian Cup leh Champions League-ah pawh inkhel a la enkawl ngai lo.

Carlo Ancelotti enkawl Brazil hian World Cup 2026-ah khan round of 16 bak an thleng phak lo a, World Cup 2030 khel tur team thar din tum mek laia Japan hneh loh hi Italian coach tan chuan a na ang.