
India U17 tan fiahna pawimawh

AFC Under-17 Asian Cup 2027 Qualifiers-ah India chu vawiin chhun dar 1:00 hian Palestine nen an inkhel dawn a, India U17 tan vawiin an inkhel tur hi match pawimawh tawpkhawk a ni.
Uzbekistan-a khelh tur AFC U17 Asian Cup 2027-ah team 16 chauh an inel dawn a, hei vang hian qualifier-a group tina hmahruaitu chauh chu inelna hmachhawn tur an ni dawn - India leh Palestine hi match hnih an khelh tawhah an la chak ve ve.
India awmna group E-ah hian India leh Palestine bakah group E qualifier bik thlengtu Malaysia, Singapore leh Guam an awm a, Blue Colts hian Singapore (4-2) leh Guam (12-0) hneh tawhin, ram pahnih hian beisei tur an nei tawh lo.
Malaysia hi match hnih khelh tawhah vawi khat chakin, beisei tur an la nei a, mahse, tuna a lan dan chuan India emaw Palestine emaw hi tlang tur an ni - India hian Palestine leh Malaysia a la hmabak.
India tan hian draw result ringawt pawh a tawk thei - Guam lakah goal 12 an score avangin India hi goal difference-ah an ṭha zawk a, team pahnih in draw ta se, an match tawp berah chak zui ve ve ta bawk se, Palestine tan tlang tur chuan Singapore lakah uchuak taka goal khung a ngai dawn.
Mehrajuddin Wadoo kaihhruai India U17 tan thil thleng thei dang zawng pumpelh nana pawimawh ber chu Palestine hneh a ni a, vawiinah hnehna an chang a nih chuan India tan AFC U17 Asian Cup chu a chiang ang hiala sawi theih a ni ang - Malaysia an la tum dawn tih erawh hriat reng a ṭha.
India tan captain Dallalmoun Gangte chu innghahna tur a ni leh dawn a, Kolasib Hmarveng rawlthar hian match hnih lek khelhah goal ruk a khung der tawh - Palestine lam tan chuan ven uluk a ngai khawp ang.
Blue Colts-ah hian Khawzawl midfielder R. Lawmsangzuala, Ruantlang defender Zoramdinthara, Armed Veng South defender Lawmsangzuala leh Thingsai defender Malsawmtluanga te an awm bawk a, Mizo player-te hi squad tikimtu ni loin, hmun an chang phak vek.