
SAFF Final: Pakistan hmaah India an mualpho ang em?

Zanin dar 7:30-ah SAFF Championship final khelh a ni dawn a, India leh Pakistan an inhmachhawn dawn - ram pahnih hi international football-ah lo intawng ngun tawh mah se, tun hi SAFF final-a an intawn vawi khatna tur a ni.
India hi SAFF Championship-ah nomawi chawi ngun ber niin, 1993, 1997, 1999, 2005, 2009, 2011, 2015, 2021 leh 2023-ah te champion nomawi an chawi - zaninah an champion leh chuan a zawna vawi thum an champion-na hmasa ber tur a ni ang.
Mahse, India hi Pakistan nena an lo intawn tawh vawi 30-ah rin hlawh zawk ni vek mah se, zaninah chuan rin hlawh lo zawk an ni dawn - hei tak hian inkhel en a tichâkawm zual a, Blue Tigers tan fimkhur a ngai dawn.
India hian group stage-ah Pakistan hi 3-2 in an hneh tawh. Mahse, semifinal-a a thlengtu Bangladesh pet chhuaktu Pakistan hi India nena an intawn hmasak ai khan an ṭha tawh zawk a, khatihlaia player tel lo, ram pawna inkhel pangain squad an zawm leh tawh.
India buaina
Blue Tigers hian tun international break-ah squad pahnih neiin, squad pakhat zawk chu coach Khalid Jamil hoin New Zealand-ah an feh chhuak a, mualneitu team nen vawi hnih an inkhelhah an tlawm ve ve.
Hetihlai hian squad pakhat zawk chuan SAFF Championship hi an khel a, coach pawh India Under-23 coach Naushad Moosa a ni a, India U15 coach Bibiano Fernandes chuan a pui bawk.
India hian an squad neih ṭhat ber thawhchhuahpui lo chungin final an lut tho a, chutihrual chuan Pakistan hi an intawn hmasak aia an squad a chhah tak avangin India tan a awlsam dawn lo.
Blue Tigers hi player inhliam, Mumbai City player pathum kohkir leh New Zealand tour zawm ta player ṭhenkhat vangin an buai viau a, final khel tur hian, goalkeeper chhiar tel lohin player 17 chauh an nei niin an sawi!
Pakistan ve thung
India-in vawi 30 intawnah Pakistan hi vawi 17 an hneh a, vawi li chiah Pakistan chak vein, vawi kua an inhnehtawk. Mahse, Pakistan hian Bangladesh hmachhawn hma khan foreign-a khel player panga an koh belh a, India aiin an ṭha tawh zawk!
Pakistan squad zawm thar zingah centre back Abdullah Iqbal hi a langsar viau a, Swedish top division club Mjällby tana regular taka khel phak a ni - a laia a kawppui tur Easah Suliman hi Azerbaijan Premier League club Sumgayit tana khel niin, England tan age level hrang hrangah a inlan tawh.
West Brom forward hlui Adil Nabi hi dan a harsa dawn - Greece third division club Panachaiki tan a khel mek. Danish second division club Kolding IF forward Abdul Arshad leh Swedish third division club Vasalunds IF winger Ali Khan te pawh Bangladesh lakah an langsar viau.
Goalkeeper Yousuf Butt hi Danish second division club Ishoj tana si ban nghaktu a ni a, kum 37 mi keeper hi Denmark-a piang niin, Danish club tan a khel kual nual tawh a, a vawi khat nana SAFF champion nih a châk khawp ang.