Vawiin aṭangin MBBA Cup

Mizoram Basketball Association (MBBA) buatsaih MBBA Cup 2026 chu vawiin aṭangin Chawnpui Sports Complex-ah khelh ṭan a ni dawn a, Mizoram Super League leh D League club bakah hmeichhe team te an inel dawn.

MSL leh D League club te hi pool ngaah ṭhen hran an ni a, pool tina club te an intum kual hnua hmahruaitute ṭheuhin quarterfinal an lut tlang nghal ang a, a tiṭha ber pahnih thlan chhuah leh tur niin anni hian quarterfinal an lut bawk ang.

Hmeichhe club te erawh pali chauh an nih dawn avangin pool khatah dah vek an ni a, match thum an khelh hnua hmahruaitu leh anmahni hnaih bertuten final an khel nghal dawn thung.

Inelna hi November 21, Inrinni thleng Chawnpui Sports Complex-ah khelh tura ruahman a ni a, November 23, Thawhṭanni aṭangin Hawla Indoor Stadium, Republic Vengthlangah khelh chhunzawm a ni dawn a, final thlenga khelh a ni tawh ang.

Vawiinah MBBA Cup champion lai Chanmari BC an inlan nghal dawn a, MSL Club tam zawk an inlan bawk ang. Kumin MBBA Cup hi a hmunah en man a awm dawn lo a, MBBA YouTube Channel-ah live-a pek chhuah a ni dawn bawk.