
Celtics-in Mavericks an sawp
NBA regular season khelh mekah nimin zing khan Boston Celtics chuan 131-94 in Dallas Mavericks an sawp. Mavs hian first quarter-ah point kua chauh score theiin, hetiang thil hi tun season-a vawi hnih a thlenna a ni.
TD Garden, Boston-a inkhelah Celtics-in bul an ṭan ṭha a, Derrick White, Jayson Tatum leh Jordan Walsh te an khel ṭha a, three point line aṭangin an vawm lut nghal mawlh mawlh a, a chhungah an hlauhawm tel bawk avangin point 42 an score nghal.
Mavs-in Celtics player te chhanletna tur an nei thei lawk lo a, an basket a tang rei ṭhin hle. Cooper Flagg leh a ṭhiante hian point kua bak an hlawh chhuah theih loh avangin, first quarter khel zo chauh mah se an inthauhna a tam avangin thawh leh a har tawh.
Second quarter-ah Celtics an khel ṭha chhunzawm a, Payton Pritchard leh Hugo González ten point an nei leh nghal. Mahse Mavs an insiamṭha chho a, Flagg bakah Zaccharie Risacher, PJ Washington leh Walter Clayton Jr. ten hma an sawn.
Mahse Celtic kut kal lai a tawp thei lo a, defence lamah Mavs an ṭan khawng theih loh avangin Celtics-in hma an hruai tluan zak a, second quarter a khelh zawh chuan chak tur a chiang titih tawh.
Theihtawp chhuahin Mavericks-in bei let mah se first quarter-a an point score tlem chu an tuar a, point hlawh chhuah lamah hma sawn mah se an in thlauhna a zau em avangin a tlawm zawkah an ṭang.
Celtics tan Tatum chuan point 32 neiin ani aia score hnem an awm lo a, point 10 aia tam nei thei panga - Walsh, Pritchard, White, Baylor Scheierman leh Ron Harper Jr. ten an thawh hlawk viau bawk.
Hetihlai hian Mavericks tan Kyrie Irving chuan a khup vei lamah hliam a neih avangin a inlan thei lo a, kum 34 mi point guard tel loin Mavs an ṭha tawk lo.
November 19, Ningani zing dar 6:30-ah Mavs hian Golden State Warriors an hmachhawn leh nghal dawn a, Kyrie hi a inlan theih tawh dawn niin khawthlang chanchinbute chuan an tarlang. Warriors innghahna Stephen Curry erawh a inlan theih a rinawm loh thung.