
Klopp-a'n Infantino a sawisel
Germany manager Jurgen Klopp chuan FIFA president Gianni Infantino a sawisel a, a thlak tak Sepp Blatter ai pawha hna thawh ṭhat loh zawk thu a sawi.
Kum 59 mi Klopp chuan, "Football hi kum tam tak chhung ka lo luhchilh tawh a, kei aia thil hre zawk tam tak an awm bawk ang. Mahse tunah chuan mi tam zawk hian thil inthlak danglam a awm a ngai tih an hrethiam ang.
Sepp Blatter hnuah khan a chhe zawnga thil a kal leh theih tawh pawh ka ring lo. Mahse tu emaw chuan chutiang thil chu a ti tlat si. Infantino thawh tawh dan thlirin a dawta president ni leh tur hi tupawh ni se, hna a thawk ṭha zawk ngei ang," a ti.
Kum 2015 khan eiruk thubuai a neih hnu lawkah Blatter hi a hna aṭangin a bang a, Infantino chuan February 2016 khan Blatter-a kalsan tak hi chelh zuiin kum 10 chhung president a ni tawh.
President inthlan thar hi nakkum March thlaah neiha ni leh dawn a, Infantino paih thlak tumin Kozo Tashima leh Ramon Vega te chuan hming an pe lut tawh a, Arsenal manager hlui Arsene Wenger-a hming pawh lam rik a ni.