
Haas tan Camara tlan zel dawn
November 22, Pathianni zana neih tur Las Vegas Grand Prix-ah Haas tan Rafael Camara a vawi hnihna atan a tlan leh dawn a, Camara hi Esteban Ocon thlaktu tur a ni.
Brazilian driver Camara hi season thara Haas driver nghet tur a ni a, November 8, Pathiannia Brazilian GP-ah khan Haas aiawhin a lo tlan tawh a, 20-naah thlengin point a hlawh chhuak zo lo thung.
Kum 21 mi Camara hi Las Vegas GP-ah tlan dawn mah se, Haas chuan Qatar leh Abu Dhabi GP-a tlan tur an la tichiang lo a, Camara hian a team tan hian Middle East-a inelnaah hian a tlan leh mai hmel hle.
Camara chuan, "Las Vegas-a intlansiak hun ka nghakhlel tawh hle a, Brazil kha ka tan inzirna ṭha tak a ni. Tun ṭumah chuan ka track la hriat ngai lohah ka tlan dawn a, fimkhur a ngai dawn. Mahse hma ka sawn theih nan theihtawp ka chhuah dawn a ni," a ti
Haas team principal Ayao Komatsu chuan, "Brazilian GP-ah khan Camara hian khaw nuam lo tak hnuaiah bul a ṭan a, mahse kum 2027 atana amah kan thlan chhan a tilang chiang hle. A lakah beisei kan nei sang a, Haas tana vawi hnih a tlanna turah hian a hma aia ṭha zawka a tlan ngei kan ring a ni," a ti.
Tun season-ah Haas hi an che ṭha tawk lo hle a, constructor's table-ah point 31 hmuin pasarihna an ni mek a, an driver Oliver Bearman chu driver's table-ah 13-na a ni a, point 23 chiah a la hmu.
Team aṭanga an thlauh thlak Ocon chuan tun season-a Haas tana vawi 18 a intlansiakah point sarih chauh a hmu thei a, table-ah 16-na a ni pha ṭawk. Season thar aṭangin Camara hoin indinthar an tum ang.