Khelmualah Ronaldinho a lo kir

Brazil legend Ronaldinho chu Pathianni zan khan, kum 2015-a football a chawlhsan hnua a vawi khatna atan professional match a khel a, Italian Serie C club Ravenna tan khelin Forli lakah 2-0 in a chakpui.

Kum 46 mi Ronaldinho hian inkhel bul a ṭan a, goal leh assist nei lo mah se a khel chhe lo. Halftime-a thlak a nih hmain chanchinbu mi leh thlalatuten an hual hneh hle a, Brazil tana a khelhpui ṭhin goalkeeper Dida pawh hmuh tur a awm.

Barcelona midfielder hlui hian kumin nipui lai khan Italian third division club tan hian player-investor leh ambassadorial contract a ziak a, mahse player contract pangngai a nih loh avangin engtianga rei nge a khelh dawn a chiang lo.

Player a nih laiin Ronaldinho hian a career-ah goal 299 a khung a, goal 300 khung tling tura inkhelh leh zel a tum nia sawi a awm a, Forli laka penalty an hmuh chu khelmuala a awm lai ni se a pet ngei rinawm.

Ronaldinho chuan, "Helai hmuna khelh hi nuam ka ti a, dressing room boruak pawh a nuam hle. Club president-in min mamawh a, min ko leh a nih chuan khelh zel ka hreh lo," tiin chanchinbu mite zawhna a chhang.