Transfer boruakin min nghawng - Vinicius

Real Madrid forward Vinicius Jr chuan nipui transfer laia Santiago Bernabeu chhuahsan thei dinhmuna a ding reng khan a nghawng thu a sawi a, tun season-a a khelh ṭhat loh chhanah a ngai.

Vini hian tun season inelna hrang hrangah Real tan match 12 khelin, goal khat chiah a la khung a, assist vawi thum a nei bawk - nipui lai khan Arsenal nen sawizawm a ni a, Real nen contract thar chungchangah an indawr reng bawk.

Hei mai a ni lo - Vini hian World Cup-ah Brazil chu an beisei ang a thlenpui lo a, round of 16 aṭangin an tla. World Cup-a an thlen chin hian nasa taka a nghawng thu a sawi tel.

Vini chuan, "World Cup aṭanga kan tlak hnu khan, season thar atana ka inpuahchah tur angin ka inpuahchah tawk lo ni berin ka hria. Kha tournament-in Brazilian zawng zawng min nghawng dan kha a na em a ni.

"Khatiang taka hmaa knockout kan nih kha kan inring lo reng reng a, kha vang khan ka chawlh neih chhunah khan, rilru tihhahdam nan nuam ti takin hun ka hmang a, ka chawl rei hret a, ka chhungte nen hun kan hmang nasa bawk.

"Khatiang a nih avang khan season hmasaa kan chawlh lai ai khan training ka nei tlem a, chu chuan season ṭannaah nghawng a nei na lo thei lo a ni," a ti.

Vini chuan a contract chuan a nghawng nat thu sawi telin, "Ka contract chiang lawk lo khan nasa takin min nghawng bawk. Min lakluh tum club kha an tam em em a, Real-a ka dinhmun chiang lo bawk nen, ka rilru kha a buai hle a ni," a ti - football-ah tak tak rilru a pe hman tawk loah a ngai.

Brazil international Vini hi October thlatira Villarreal nen an inkhelh ṭumin red card pek a ni a, Villarreal midfielder Nathan Saliba chu a samah a pawt - match li ngawt inkhel thei lo tura hrem a ni.

Vini hrem a nih chhung hian Yan Diomande chuan a hmun ruak a lo luah a, a chhawr ṭangkai hle - goal li ngawt a lo khung! Vini hian hremna a tuar zo tawh a, Real hian Inrinni zan dar 1:30-ah Celta Vigo an mikhual dawn.

Real boss Jose Mourinho-a'n Vini a ko kir ang nge, Diomande a ring zui ang tih chu hriat a châkawm ta hle. Real hi La Liga table-ah pahnihna ni mekin, hmahruaitu Barcelona chu match 12 khelh tawhah point thumin an phak lo mek.