
Pocognoli hnuaiah Scotland-in beisei pha lo

UEFA Nations League group stage khelh mekah Thawhṭanni zan khan Switzerland chuan 4-0 in Scotland an sawp a, Scotland hi coach thar Sebastien Pocognoli hnuaiah vawi thum an tlawmna a ni der tawh.
Switzerland lakah Scotland an vanduai a, midfielder Lewis Ferguson-a'n an lamah tilutin an hmahruaina goal a khungsak. Red Crosses tan Winsley Boteli, Alvyn Sanches leh Zeki Amdouni ten goal khat ṭheuh an khung bawk. Scotland-in a chhanletna tur an nei ve lo.
Scotland hian point sarih hmuin table-ah pathumna an ni a, Switzerland hi hneh ta pawh ni se Slovenia-in North Macedonia an hneh avangin point an hmu tlem zawk dawn tho.
August thla khan Belgian coach Pocognoli chuan Steve Clarke thlakin Scotland a enkawl ṭan a, Tartan Army hotuten team enkawl lama tawnhriat ngah lo tak lakah rinna an nghat ngam.
Belgian coach hian Nations League aṭangin a hna hi a ṭan a, inkhel a enkawl hmasak berah anni aia team nem zawka ngaih Slovenia lakah hnehna an chang zo lo a, Switzerland-in an sawp zui bawk.
Hemi hnu hian North Macedonia hneh mah se an insiamṭhat hmain Slovenia an hneh lo a, November 14, Inrinni khan North Macedonia lakah chak chhunzawm mah se Switzerland bawkin an sawp leh a, Nations League an mangṭha a ngai.
Switzerland laka ram tana inlan hnem ber record siamtu Andy Robertson (103) chuan an coach tharin player te chu dawhthei turin a duh a, mahse hun an nghak turin hun an neih loh thu a sawi ve thung.
Liverpool defender hlui chuan, "Kan hun tawn mek hi a harsa hle a, international football-ah chuan insiamremna hman a awmin ka hre lo. Chuvangin tih tur nia kan hriat chu kan ti tawp mai tur a ni a, thil dang nghak hman kan ni lo," a ti.
Kum 32 mi Robertson hian record a siam zanah hian captain armband a hreng a, mahse chiang taka an chak loh avangin a tan zan chhinchhiah reng tur hi theihnghilh tlak a ni.
A hma hun chungchangah Pocognoli chuan engmah a la sawi lo a, mahse International break leh hmasa ber chu nakkum March thlaah daih neih a ni tawh dawn a, result a neih ṭhat loh avangin hemi hma hian a bang ang em tih a chiang lo.