Owono-a'n match 12 hrem a phu lo - Pique

Spanish third division club FC Andorra neitu Gerard Pique chuan an goalkeeper, Jesus Owono thil tihsual chu tum reng vang a ni lo a, match 12 hrem a phu lo tih a sawi.

November 2, Pathianni zan khan Andorra leh Tenerife te an inhmachhawn ṭumin, Tenerife forward Jesus de Miguel chu Owono nen an insut hnuah nikhaw hre loin a tlu. De Miguel hi damdawiin panpui nghal ni mah se tukah a thi zui.

Kar hmasa khan Spanish football thuneitu Royal Spanish Football Federation (RFEF) chuan Owono hi match 12 chhung khel thei lo turin an hrem. Owono hian an hremna hi a hmang tluan a nih chuan kuminah a inkhel thei tawh dawn lo a, nakkum February a nghah thlen a ngai.

Barcelona defender hlui chuan, "Spanish second division-ah pawh lua intlawh avangin red card phawrh a ni a, thihna em chu thleng ve lo mah se match thum chhung atan an inhrem.

Ka sawi awmzia tak chu tuna Owono an hremna hi a thiltih vang nge thil thleng vang zawk? Match 12 chhung hrem hi a phuin ka hre lo a, eng ang thuchhuah leh thutlukna pawh siam se De Miguel hi a dam leh phah dawn lo," a ti.

Kum 25 mi Owono hi Africa Cup of Nations qualifying khelh turah an ram Equatorial Guinea squad aṭangin a inhnukdawk tawh a, Guinea hi nizan khan Zimbabwe lakah 3-0 in an tlawm a ni.