MBBA Cup a 'hot' nghal

Mizoram Basketball Association (MBBA) buatsaih MBBA Cup 2026 chu nimin aṭang khan khelh ṭan a ni a, champion lai Chanmari Basketball Club chuan hnehna an chang nghal.

Chanmari hian 80-76 in Dawrpui Hotshots an hneh a, point guard che rang Lalrozama leh a unaupa Lalnunpuia te an langsar leh pek a, Eddie Zaithanmawia leh Malsawmtluanga te an ṭangkai viau bawk.

Mizoram Super League champion lai Khatla TBL an chak nghal bawk a, MSL kai thar Vanguard BC chu 71-58 in an hneh. Saron BC pawhin Chaltlang BC chu point 30 zeta intlauhin an hneh a, semifinal lut turin theihtawp an chhuah a ngai tawh ang.

MBBA Cup hi Chawnpui Sports Complex-ah khelh a ni a, a hmuna inkhel en man hi a awm lo a, MBBA YouTube channel-ah live-a pek chhuah a ni bawk ang.

Inelna hi chhunzawm leh nghal tur a ni a, Mission Vengthlang BC leh D3 BC Kulikawn te an inhmachhawn leh dawn. Team pahnihte hi Aizawl District Basketball Association (ADBBA) buatsaih, ADBBA Cup 2026 final-a intawng zo hlim an nih avangin inkhel hmuhnawm a beisei ngam ang.