Russell a insiamṭha dawn - Wolff

Mercedes team principal Toto Wolff chuan an driver George Russell chu a insiamṭha dawn a, season tharah a ai ṭha zawka a lo kir leh tur thu a sawi.

Wolff chuan, "A insiamṭha dawn a, chu chu ka chiang a ni. Season thar kan hman turah hian Russell thar kan hmu dawn. Infiamna hrang hrangah tu pawhin hun harsa leh tlakhniam lai kan nei vek a, mahse hei hi Russell-a tichak tu tur a nih ka beisei," a ti.

Kum 28 mi Russell hian tun season bul a ṭan ṭha a, March thlaa inelna hmasa ber Australian Grand Prix-ah hnehna chang nghalin a lakah beiseina a sang.

March thla veka neih Chinese GP-ah Russell hi pahnihna a ni thung a, a teammate Andrea Kimi Antonelli chu pakhatna a ni ve thung. Hemi hnuah hian Japanese GP-ah Russell hian podium a lawn pha lo a, harsatna a tawk chhunzawm.

Inelna ṭhenkhatah Russell a tlan laklawh laia, a car a chhiat vang leh a chetsual avangin a tawp thlen theih loh ṭum a nei zeuh zeuh. Hetihlai hian a teammate Kimi Antonelli erawhin season duhawm a hmang a, inelna pathum la awm turah a champion der tawh.

Tun dinhmunah Russell hian vawi thum hnehna changin, vawi riat podium lawn mah se driver's table-ah Max Verstappen-a'n a lehpel tawh a, a teammate-in record siam chunga a champion laia tlakhniam lam a pan avangin a chhuah mai ringtu pawh an tam hle.

Mahse amah Russell ber chuan tluk hlen a tum loh thu a lo sawi tawh a, a laklawha insiamṭhat harsa a tih avangin fans te chu season thar nghak turin a lo chah tawh bawk.

Russell hian hun harsa tawng mah se point 262 a hlawh chhuak tawh a, constructors' table-a Silver Arrows (Mercedes sawina)-in hnehna an chan theih nan Antonelli tluk zetin a thawh hlawk a, a pawimawhna hi hmuh hmaih theih a ni lo.