
Ram tan pawh Jackson a vul zel
Aston Villa forward Nicolas Jackson chu ram tan pawh goal khung a bansan lo a, Thawhṭanni zan Africa Cup of Nations qualifying match-a Sudan an hneh ṭumin goal a khung a, Senegal chu 4-2 in a chakpui.
Kum 25 mi Jackson hian minute lina lekah goal hmahruai a khung a, El Hadji Malick Diouf chuan belhchhah ve bawkin first half-ah 2-0 in hma an hruai.
Second half-ah Sudan tan Al-Gozoli Nooh leh Salaheldin Adil ten goal khat ve ve khungin an siphurh an sut zo a, mahse Pathé Mboup-a'n goal khung lehin an ram hma a hruai nawnpui a, hun pek belhah Paul Mendy-a'n an chak nemnghehna goal a khung bawk.
Tun season-ah Jackson hi a khel ṭha takzet a, Villa tan Premier League-ah goal ruk khung tawhin Champions League-ah goal thum a khung tawh bawk. AFCON qualifying-ah goal hnih a khungna chiah a ni bawk.
Senegal hi group J-ah Sudan bakah Mozambique leh Ethiopia te nen awm hoin hmahruaitu an ni mek a, thil mak a thleng a nih loh chuan an hmahruaina hi an hloh a rinawm
tawh loh.