
Crystal Palace coach thar Frank a phur
Crystal Palace chuan Pierre Sage thlak tura an lak Thomas Frank chu a phur tawh a, player te bakah stadium chhung leh pawna club ṭantute hmuh hlan a nghakhlel tawh tih a sawi. Brentford leh Tottenham Hotspur manager hlui Frank hian Eagles-ah hian kum thum daih contract a ziak.
Palace hian kar hmasa khan season tira an lak luh Sage an bân a, season hmasaa French Cup-a RC Lens champion puitu hian Eagles hi inelna hrang hrangah match 16 bak a kaihruai hman lo. Sage nen an inṭhen hnuah manager tam tak hming lang mah se, Frank-a hming a ri ring zual a, kar khat hnuah an in la lut fel nghal der.
Kum 53 mi Frank chuan, "Crystal Palace hi Premier League mai bakah England-a club langsar an ni phâk a, he club hi a sang thei ang ber thlenpui turin ṭha takin hna ka thawk dawn a, ka phur tawh takzet a ni," a ti.
Eagles chairman Steve Parish chuan Frank hi an team enkawltu tur dik tak a nih thu a sawi ve bawk a, Premier League-ah Tottenham Hotspur leh Brentford te a lo enkawl tawh avangin a lakah beisei a sang dawn.
Hetihlai hian English keeper hlui Rob Green chuan, Frank-a tan Palace chu a danglam dawn tih a sawi a, Brentford te nen khaikhina an inrelbawl dan a inthlauh avangin a tan a harsat a rin thu a sawi ve bawk.
West Ham tan pawha khel tawh Green chuan, "Palace-ah chuan player ṭha tak an la lut emaw an chher chhuak ang a, man to takin an hralh leh ang. Mahse a thlak turin anmahni anga ṭha an la lut leh tawh ngai lo.
Hetiang vang hian manager ṭhenkhatin an hna an chân phah tawh a, hetiang thil hi a chunga a thlen ve lohna turin Frank a ngaihtuahna a sen uluk a ṭul ang," a ti. Eagles hi table mawngphahah point sarih hmuin an awm mek a, November 21, Inrinni zana Coventry nen an inhmachhawn hunah Danish manager hian a enkawl ṭan ang.