LeBron tel loin Sixers an chak

Philadelphia 76ers chuan nimin khan Brooklyn Nets chu 135-123 in an hneh a, Sixers hi an player langsar ber LeBron James tel loa khel an nih avangin result duhawm bik a ni.

Barclays Center, New York-a inkhelah Sixers hian bul an ṭan ṭha a, Joel Embiid a tal na nghal hle. First quarter-ah Sixers hian point 33 neiin second quarter-ah phei chuan point 45 zet an score tling.

Sixers hian 78-59 a chawlhlawk an hman theihna turin Embiid bakah, Jaylen Brown leh Tyrese Maxey ten an thawh hlawk a, VJ Edgecombe leh Jabari Walker te an ṭangkai viau bawk.

Third quarter-ah erawh Sixers an inthlahdah a, Nets-in an hun ṭha neih an chhawr ṭangkai bawk. Nets tan Michael Porter Jr, Julius Randle leh Nolan Traore te kut a kal ṭan a, Egor Demin leh Keon Ellis te an khelh ṭhat chhoh bawk avangin 105-95 in an inthlauhna an pawt hniam.

Fourth quarter tir lamah Nets hian Sixers hi point nga chauha phak loh lai an nei hman a, minute khat khelh tur la awmah phei chuan point li chauhin an inthlau tawh.

Nets hian an khingpui pawt thlaa inlehthalna ropui thlentir thei turin beiseina an nei hman ang. Mahse Sixers tan LeBron inlan lo mah se Embiid an nei a, American center kut kal lai a tawp lo.

Three points hmangin Embiid hian an hmahruaina a tizau a, a ṭhianten an thlawp ṭha bawk. An inthlahdah duh tawh loh avangin a tawp thlengin hma an hruai tluan tawh a, Nets erawhin point neih belh zel an harsat tawh avangin a tlawm zawkah an ṭang.

Sixers hian Eastern Conference-ah hma an hruai chhunzawm zel a, hliam vangin veteran player LeBron chhawr thei lo mah se an buai phah lo - champion zia an pu ṭan.

Kum 32 mi Embiid chuan, "Second half-ah khan kan inthlahdah a, mahse point score lamah kan chet ṭhat avangin kan vannei. Season kan ṭan chauh a, kan hmaah match tam takin min hmuak bawk. Tun hi kan vanneih zinga pakhat a ni," a ti a, a ṭawng fimkhur hle.

Embiid hian point 37 neiin tun season-a a score hnem ber ṭum a ni a, Brown (31), Maxey (24) te bakah Edgecombe (14) leh Walker (12) ten an thlawp ṭha takzet. Sixers tana inkhel zingah Kentavious Caldwell-Pope chiah chu point nei lo awmchhun a ni.

Nets erawh an vanduai ṭum an tawng a, Randle (33), Porter Jr.(25) leh Traore (23) te che ṭha mah se point 10 ai tam score tling dang an awm ve lo a, an ṭanrual tawk lohna chu an chak loh chhanah a ngaih theih.