
Hun min pe ru, Manchester a pawl reng dawn lo - Poch
Manchester United manager thar Mauricio Pochettino chuan United States-in Haiti 2-0 a an hneh zawhah Manchester khaw club pahnihah Manchester City an chungnun reng loh tur thu a sawi. November 22, Pathianni zan hian Manchester United-in Liverpool hmachhawn turin Anfield an tlawh dawn a, Poch-a'n Red Devils a enkawl ṭan ang.
United States-in Haiti an hmachhawn hmain Poch-a'n Man United a zawm tur thu chiang tawh mah se Argentine manager hian hna ṭha takin a zo. Concacaf Nations League quarterfinal-ah US-in first leg-ah Haiti 6-0 in an sawp a, nimin zing khan 2-0 a hneh lehin aggregate-ah 8-0 in an chak.
Inkhelh zawh hian Poch hi pundit zingah a ṭhu a; US tana match 126 khel tawh leh Manchester City player hlui DaMarcus Beasley chuan, "Manchester khawpui a pawl a, a pawl reng bawk ang," tiin a sawi. Man United manager thar Poch chuan, "Hun min pe ru, Manchester a pawl reng dawn lo," tiin a chhanglet.
Tottenham manager hlui Poch chuan sawi chhunzawmin, "Kan phur hle. Chona lian tak a ni a, hetiang hun harsa hmachhawn tur hian tawnhriat kan nei ṭha bawk. Manchester United hi tuna an dinhmun anga awm hi an phu lo. Ṭantu an nei ṭha a, helai hmunah phei chuan kawnga ka hmuh 10 zela pakua hi United ṭantu an ni," tiin Man United enkawl a phur tawh thu a sawi.
Man United hian head coach chauh an thlak dawn lo a, coaching staff hlawk an thlak dawn. Poch-a puitu turte hi Jesús Pérez (Assistant Manager), Miguel D'Agostino (Assistant Coach, Toni Jiménez (Goalkeeping Coach), Silvia Tuyà Viñas (Strength & Conditioning) leh Sebastiano Pochettino (Sports Scientist) te an ni.
Argentine manager Poch hian United States tana a match hnuhnung ber a enkawl zawh hian Manchester a pan nghal dawn a, nimin vek khan a hoin training an nei nghal dawn. Coaching staff dangte erawh Manchester an thleng tawh a, nimin khan Perez, Jimenez leh Sebastiano te hoin ram tana khel ve lo hoten training an nei tawh a ni.