
Siami leh Tluangi telna India bul ṭanna tur Malaysia
Women's Asian Champions Trophy 2026 chu Bhopal, Madhya Pradesh-ah vawiin aṭangin khelh ṭan a ni dawn. Lalremsiami Hmar leh Lalthantluangi telna India team chuan zanin dar 7:00 hian Malaysia an hmachhawn ang. India hian inelna ṭan hmaa friendly match-ah Japan 4-1 in an hneh a, Malaysia lakah pawh chungnung tura ngaih an ni.
Asian Games-ah India hmeichhe team hian gold an la a, chutihrualin hmasawn zel an tum avangin coach Sjoerd Marijne-a'n player eng emaw zat a thlak. India player pawimawh Lalremsiami Hmar chuan, "Tun ṭumah hian hi chuan junior an khel tam a, senior nen kan inpawlh rual lo deuh. Mahse, kan hotuten hmathlir thui tak an neih vang a ni a, kan hmalam hun a êng viauin ka hria. Kan thawhhona a ṭha a, chona thar hmachhawn tur pawhin kan phur hle," tiin Vanglaini a hrilh.
Arjuna Award dawn hnuah Remsiami'n competitive match hmasa ber a khel dawn a, Kolasib nula hian en bik a hlawh dawn. Chutihrualin Asian Games gold medal la zinga mi Kanghmun South nula Lalthantluangi pawhin hmun pawimawh a chang dawn a, bul ṭantu zingah a tel ang. Tun ṭum inelna hi Tluangi tan hming chherna remchang a ni.
Inelna hi November 19-28, 2026 chhunga neih tur a ni a, India hi Malaysia bakah South Korea (Nov 21), Thailand (Nov 22), China (Nov 24) leh Japan (Nov 25) te nen an inhmachhawn dawn. Inelnaa tel team rukte hi vawi khat an inkhelh chhuah zawhah November 27, Zirtawpniah semifinal khelh a ni ang a, final hi November 28, Inrinnia khelh tur a ni ang.