
SAFF-a Mizo champion tawhte

SAFF Championship 2026-ah India an champion a, champion zingah Mizo defender Hmingthanmawia Ralte (Valpuia) a tel - Valpuia hian SAFF-ah hian India match hmasa ber khelin bul a ṭan a, a hnuah a inlan leh tawh lo thung.
Pangzawl/Durtlang tlangval inlan tawh loh chhan erawh Mumbai City-in an koh kir vang a ni a, ISL club hian SAFF match hmasa berah Mizo player-te kaltir mah se, AIFF nen an inremna angin koh kir an ni a, mahse, Valpuia'n match a khel hman miau a, India tan a vawi khat nan nomawi a chawi.
SAFF-ah hian Mizo player-ten champion nomawi an lo chawi nual tawh. Mizo Sniper hminglem an pek Jeje Lalpekhlua'n SAFF-ah nomawi vawi thum ngawt a chawi - Mizo zinga champion ngun ber a ni.
Jeje hian kum 2009 khan a vawi khat nan SAFF-ah nomawi a chawi a, mahse, hetah hian India Under-23 chuan inelna an hmachhawn - hetah hian Robert Lalthlamuana pawh squad-ah a tel a, Robert erawh kum 2009 bak a champion zui ta lo.
Hnahthial fapa rangkachak Jeje hian kum 2011 leh 2015-ah champion nomawi a chawi bawk a, kum 2013 khan final-ah an tlawm thung. Kum 2011-ah goal hnih a khung a, 2015-ah goal thum a khung - 2011 champion team-ah hian Lalrindika Ralte a tel bawk.
Kum 2015-a India an champion ṭum hian Jeje bakah Lalchhuanmawia Fanai leh Lallianzuala Chhangte te chu squad-ah hian an tel a, LZa hi kum 2023-a champion team-ah khan a tel leh bawk a, 2018-ah pahnihna dinhmun luahtu India team-ah a tel bawk.
India-in kum 2021-a champion nomawi an chawi ṭumin Lalengmawia Ralte chu Mizo player awmchhun a ni a, 2023-ah Apuia hi champion team-ah tel lehin, LZa nen Mizo player awm an ni.