
AIFF-in Mizo naupang thlavang hauh

Indian football-a thuneitu sang ber All India Football Federation chuan India Under-17 leh Palestine U17 inkhelh ṭuma Palestine player Taha Soueidan chet dan an dem a, India captain Dallalmoun Gangte thlavang hauhin Asian Football Confederation hnenah an lungawi lohna an thlen.
AFC Under-17 Asian Cup qualifier khelh mekah Thawhṭanni zan khan India leh Palestine an inkhel a, India hian 4-1 in Palestine hi an sawp - team pahnih inkhelh laiin, ball an inchuh zawh hnuah Palestine player Soueidan hian Dallalmoun-a lam hawiin, a kutin boruak a zap a, hei hi chi inthliarna lam hawia inhmuhsitnaah mi tam takin an ngai.
AIFF pawhin AFC hnenah lehkha thehlutin, Asian football-a thuneitu sang ber chu inkhelh laia thil thleng chu thlirlet a, uluk taka dan anga rorel turin an ngen a, AIFF chuan chi inthliarna lam hawi zawnga inbeihna chu a huat thu an sawi bawk.
Hetihlai hian Palestine player Taha Soueidan pawh hian thuchhuah siam vein, a chet dan chu Dallalmoun-a tihelna lam hawi a nih loh thu sawiin, "Malaysia boruak lum tak hnuaiah ka inzap ve mai a ni," a ti!
Soueidan hian India player-te nen chuan hotel khatah an thlen ho vek thu sawiin, ṭhian ang tak taka inkawm a, an innel thu sawiin, inhmuhsitna lam hawia an chet loh thu leh, inhuatna engmah an neih loh thu a sawi.
India captain Dallalmuon hi Kolasib Hmarveng rawlthar niin, match thum aṭangin goal sarih a khung der tawh a, ani bakah hian Ruantlang defender Zoramdinthara, Khawzawl midfielder R. Lawmsangzuala, Armed Veng South defender Lawmsangzuala leh Thingsai defender Malsawmtluanga te chu India U17 squad-ah hian an tel.
AFC Under-17 Asian Cup 2027 Qualifiers khelh mekah India hian match khat khelh an la bak a, Zirtawpni zan dar 6:30-ah qualifier thlengtu Malaysia nen an inkhel ang - an draw chauh pawhin Asian Cup khel tur hian an tling dawn.
India hian qualifier group E-ah hian Singapore (4-2), Guam (12-0) leh Palestine (4-1) an hneh tawh a, Malaysia chiah an bak ta - group hmahruaitu chauh hi Uzbekistan-a khelh tur AFC U17 Asian Cup 2027-ah an tling dawn a ni.