India aiawhin Mizo inlan dawn

Khawvel huapa taekwondo inelna ngaihhlut hlawh, G1 India Open International Championship-a India aiawh turin Mizo player paruk an inlan dawn a, anni bakah hian Mizo coach pakhat a tel bawk - inelna tur hmun Pune an pan tawh.

India Open hi World Taekwondo calendar pawimawh tak zinga mi niin, ranking tournament zinga pakhat a ni - Mizoram aṭanga inlan turte hi India-a ranking nei pha chin an ni. Senior player pathum, Lalthlamuanpuia, R. Lalbiaknuami leh Samuel Lalnunmawia te chuan senior huangah inelna an hmachhawn dawn - Aizawl Venghlui tlangval Lalthlamuanpuia hi India number 1 ni lai niin, World Police Meet-ah India ai a awh dawn bawk.

Mizo senior player pathum bakah hian cadet player, hmeichhe pathum - Arella Roluahpuii, Esther Vanlalhumhimi leh Grace B. Lalruatzeli te an inlan dawn bawk a, team coach Robert Laltluangkima'n hoin, Mizo pasarihin India Open an hmachhawn dawn tihna a ni.

India Open hi Pune, Maharashtra-ah neih tur niin, November 20, Zirtawpniah ṭan a ni ang a, November 26, Ningani thleng a awh ang. Championship hi Olympic khel phak tura tournament pawimawh tak zinga mi a ni a, an thlen san dan a zirin point an khawl ang.