Arsenal-in Hincapie chelh an tum

Piero Hincapie chu Arsenal-in contract thar an zawrh mek a, kum li zet Emirates Stadium-a cham turin contract la nei mek mah se, Gunners hian thluh ngheh lehzual nan a hlawh punsak an tum.

Kum 24 mi defender hian season hmasa khan Bayer Leverkusen aṭangin Arsenal hi loan-in a zawm a, German club nen inremna an neih sa angin Gunners hian a nghetin an la lut zui.

Hincapie hian season hmasa khan Arsenal tan inelna hrang hrangah match 39 a khel a, tun season-ah match riat a khel leh tawh bawk - Gunners hian a contract neih lai hi thla 12-a pawhsei a, a hlawh tihpun sak an tum a, an inbiakna a hlawhtling thei a nih chuan kum nga dang Arsenal tana khel turin contract a nei dawn tihna a ni.

Hetihlai hian Arsenal hian Riccardo Calafiori pawh contract thar ziahpui tumin an dawr mek a, kum 24 mi left back hian kum 2024 khan Arsenal hi Serie A club Bologna aṭangin a zawm a, kum 2029 thleng contract a nei mek - tunah pawhsei an tum a, ani pawh a hlawh a pung ang.

Arsenal hian tun hnaiah an player pawimawhte contract thar ziahpui chu hna pui berah an nei a, Jurrien Timber, Declan Rice leh goalkeeper David Raya te nena an inremna thar pawh an puang dawn hnai tawhin a rinawm.