
JJ Gabriel-a'n Man United a chhuahsan dawn
Manchester United rawlthar duhawm JJ Gabriel chu a chhuak dawn a, English rawlthar hian Thawhlehni zan khan instagram-ah Man United thlahna video a tarlang.
Gabriel hian Spanish club lian Real Madrid zawm turin, thuphungin inremna an nei tawh a, inremna mumal la awm lo mah se Santiago Bernabeu panin a puan thuah a tel a rinawm.
Mangṭha JJ
Kum 16 mi Gabriel chuan, "Kum 2020 khan kum 10 mi lek niin helai hmunah hian beiseina sang tak neiin ka lo kal a, mi puitlingah min chherin, Old Trafford-ah goal ka khung bakah Jimmy Murphy Award hial ka dawng.
Ka hriat reng tawh tur hun min tawntir a, coach leh staff ka thawhpui tawh zawng zawngte leh min lo ṭantute chungah, ka chungah rinna in nghat a, ṭha tak leh ropui taka ka seilen theih chhan in ni. Ka zinkawng zawh leh zel turah pawh ka theihnghilh ngai lo ang che u. Engkim avangin ka lawm e," tiin a video tarlanah a sawi.
Video hi second 50-a sei a ni a, Gabriel-a'n United a zawm tirh bakah hlawhtlinna hrang hrang a channa leh Atletico Madrid nen, nikuma Stockholm-a pre season an khelhna a lang a, Cristiano Ronaldo fapa nena an lan dunna pawh a lang tel bawk.
Hmanah chuan...
Gabriel hi Enfield, England-ah a piang a, grassroots club Top Ballerz FC tan a khelh hnuah Chelsea, Arsenal leh West Ham academy-ah te a awm kual chhunzawm.
Kum kaw mi chauh a nih laiin YouTube-ah a inkhel lai video a darh a, a thiam em avangin 'Kid Messi' tia koh a ni. Nike nen inremna ziak nghal bawkin, a hmabak a êng hle.
Nikum April khan United under-18 team tana khel thei naupang ber record a siam a, kum 14 mi chauh niin Leeds United lakah goal hnih a khung nghal. Season hmasa khan first team training zawmin, Under 18 Premier League Player of the Season-ah thlan a ni zui bawk.
Mahse, Gabriel hian United senior team tan match khat chiah a khel hman a, tun season ṭan hmaa AC Milan nen friendly match an khelh ṭum khan bench aṭanga luhtir a ni a, United hi 4-2 in an chak lo.
Beisei bo
September thla khan UEFA Youth League-ah Sabah lakah hattrick a siam a, khami zan vek khan Shea Lacey leh Harry Amass te chuan senior team tan UCL-a an match hmasa ber an khelh avangin Gabriel-a'n a beisei ve.
Lacey leh Amass te UCL-a an inlan laia Gabriel inlan ve thei lo chu a pa Joe O'Cearuill a lungawi lo nia sawi a awm a, hemi hnu reiloteah Gabriel chuan IG-a a thlalak a dah bo vek a, Man United lam kaihhnawih thil zawng zawng a tibo vek bawk.
Gabriel-a chhungte hian Premier League-a Bournemouth nen an inhmachhawn ṭumin, minute 20 tal khel turin an phut a, mahse, beisei angin thil a kal lo. United an che chhe takzet a, Michael Carrick-a tan kum 16 mi luhtir ngamna chi a ni lo.
An thil phut ang tihhlawhtlinsak an nih tak loh avangin Gabriel hian chhuah a ngiat a, hemi hnu hian a inkhelh tawh loh bakah training pawh a zawm lo a, a chhuak dawn ta nge nge.
Red Devils hian Gabriel-a registration chu season tawp thleng la kawl dawn mah se, Gabriel hian Cyprus thisen kai a nu kaltlangin European Union (EU) passport a nei a, hei vang hian United tan chelh theih a ni lo.
Hello Real
Tun thlatira Ballon d'Or dawn a duh thu sawitu hian, Man United a chhuahsan dawn tih a chian hnuah club lian tam tak hming a ri nghal a, United elpui Manchester City pawh lam rik a ni. Mahse, Real hming a ri ring ber thung.
Gabriel hian kum 17 a la tlin loh avangin professional contract a la ziak thei lo a, transfer fee awm loin Los Blancos a zawm thei ang. Mahse Real hian United chu zangnadawmna €360,000 an pek a ngai dawn.
Hei bakah hian Gabriel an lak theihna atana thil ṭul an tihfelsak vek dawn a, Spanish club hi pawisa seng lo tawp tur an ni bik lo. Mahse, transfer window inhawn hun nakkum January an nghah thlen a ngai thung ang.