
Lakers chhandamtu Grimes leh Doncic
NBA regular season khelh mekah nimin zing khan Los Angeles Lakers chuan 118-114 in Charlotte Hornets an hneh a, overtime vawi khat khelh hnuah Quentin Grimes leh Luka Doncic ten Lakers an chakpui.
LeBron James-a'n a chhuahsan hnuah Lakers hian hniam lam an pan lo mai a ni lo a, an ṭha zawk emaw tih tur hial khawpa khelin, Western Conference-ah hmahruaitu an ni mek.
Crypto.com Arena, Los Angeles-a inkhelah a tir aṭangin team pahnihte an inngam tawn a, point an inneih chhawk nghal. Hornets-in hun tam zawkah hma an hruai a, mahse, an inthlauhna tam lutuk tur chu Doncic leh Grimes ten an pawt zim ve zel.
Inhnehtawk hle mah se first quarter-ah Hornets player te kut a kal zawk a, Coby White leh Brandon Miller te three points luh karah Ryan Kalkbrenner-a'n point a nei ve reng bawk a, 34-30 in first quarter an khar.
Second quarter-ah pawh Hornets an khel ṭha chhunzawm a, Miller-a kut kal lai a tawp lo. Mahse, Lakers an beidawng bik lo a, Doncic hmangin an chhanglet thei zel a, 66-59 in chawlhlawk an hmang.
Third quarter-ah Grant Williams leh Sion James ten Miller an thlawp ṭha a, Hornets hian point 28 an score theih laiin Lakers erawhin point 22 chauh an hlawh chhuak thei a, 94-81 a an inthlauh avangin Hornets an chak a rinawm tawh.
Mahse, fourth quarter-ah Lakers-in champion zia an chhuah a, point 30 zet an hlawh chhuak thei. Defence lamah an ṭang khawng bawk a, an lamah point 17 chauh a luh avangin point 13-a an hnufual hnuah an tho chhuak leh thei.
Lakers tan Grimes a inlar a, American shooting guard hian fourth quarter-ah ringawt point 21 a score a, second hnih chiah awm tawhah three points vawm lutin 111-111 in an nihrual a, overtime khelh a ngai.
Kum 26 mi Grimes hi Doncic-a'n a thlawp ṭha a, three points bakah Sandro Mamukelashvili chu 'paint area'-ah Hornets tan a hnawk a, overtime an khelh theih nan an thawh hlawk hle.
Overtime-ah Lakers an chet ṭhat bakah an vannei tel a, 114-115 a hma an hruai laiin Hornets forward Royce O'Neale-a'n ball a hloh a, foul bak tih theih an nei tawh lo. Lakers-in free throw an hmuh an hlah duh tawh loh avangin phu takin an chak.
Grimes chuan point 47 neiin, three points vawi 10 a lut a, Lakers tan Kobe Bryant nen match khata vawi 10 emaw a aia tam lut thei awmchhun an ni. Slovenian point guard Doncic chuan point 36 a nei ve bawk.
Lakers tan Walker Kessler leh Austin Reaves te chu hliam vangin an inlan lo a, Reaves hi a ke artui vei lam na vangin a chawl mek a, a lo kir hun tur a sawi theih loh. Kessler erawhin dam lam a pan a, a inkhelh leh theih tawh a beiseiawm.