Zemabawk leh Zarkawt chak ve nghal

Mizoram Basketball Association (MBBA) buatsaih MBBA Cup 2026 chu Thawhlehni zan leh nimin chhun khan khelh chhunzawm a ni a, Mizoram Super League semifinalist Zemabawk Basketball Club leh Zarkawt BCA ten hnehna an chang ve nghal.

Thawhlehni zan

Zemabawk hian Chawnpui Basketball Club chu 67-44 in an hneh a, Lalropuia awm lo mah se hnehna an chan theih nan K. Lalthianghlima, Lalruatkima leh Michael Lalṭhakima ten an thawh hlawk a, Favang Tournament-a hming chher tak Lalrinchhana a khel ṭha viau bawk.

ZBBC coach C. Vanengmawia chuan a team hi a ho thei lo a, assistant manager atana an lak thar H. Lalhruaitluanga leh manager Malsawmtluanga Hauzel (Ab-a) ten Zemabawk hi an kaihruai. Inelna neihna veng club Chawnpui BC-in 'home advantage' an hmang thei lo a, a tlawm zawkah an ṭang.

Favang Tournament champion BCA-in 73-53 in Chhinga Veng an hneh ve thung a, mahse BCA hian inkhel tir lamah harsatna an tawk. Chhinga Veng tan Lalruatkima a khel ṭha nghal a, first quarter-ah BCA an talbuai lek lek.

Mahse, BCA an buai rei lo a, defence lamah Matthew Remtluanga Sailo a khawng ṭha a, Zonunsanga, H. Lalhmachhuana leh Lalhmingsanga te hoin an ṭang tluan thei. Lalrina Renthlei awm lo mah se an squad a chhah vangin champion rinkai ber zinga mi an nih chhunzawm.

Engtin zel?

Nimin inkhelah Mission Vengthlang BC chuan 79-49 in D3 BC Kulikawn an hneh a, team pahnihte hi Aizawl District Basketball Association (ADBBA) buatsaih ADBBA Cup final-a intawng tawh an ni a, MSVT-in tihpalh thil thua champion an ni lo tih an lantir.

MBBA Cup hi vawiinah khelh chhunzawm leh tur a ni a, MSL leh D League club bakah hmeichhe inkhel hmuh tur a awm tawh dawn bawk. Inelna hi Chawnpui Sports Complex-ah khelh niin a hmuna inkhel en man hi a awm lo a, MBBA YouTube channel-ah live-a pek chhuah a ni bawk ang.