
Taekwondo black belt thar 29 awm
Mizoram Amateur Taekwondo Association (MATA) chuan nimin khan Taekwondo Black belt Awarding Ceremony an hmang a, he hunah hian black belt pass thar mi 29-te hnenah belt hren tir a ni - belt hi Remlalhlimpuia 4th Dan, Mosss Lalsangzuala 3rd Dan, Vanlalmawipuia 3rd Dan, Daniel Lalhumthanga 3rd Dan, Vanlalthlenga 3rd Dan leh Alaz Rosema 2nd Dan ten pass tharte hnenah an hrentir.
Bible House, MG Road, Khatlaah black belt hlanna hun hi hman niin, pass thar mi 29-te hi 1st Dan Black belt mi 28, 2nd Dan Black belt mi pakhat niin,
World Taekwondo Headquarters, Kukkiwon, South Korea aṭanga Certificate an rawn pek chu hlan an ni bawk.
Kum 2008 aṭang khan Aizawl hi exam Centre atan pawm a ni a, 2016-ah Black belt examiner chu Master VL Sawma leh Master Joseph Thansanga ten pass-in, anni pahnih an pass hnuah Aizawlah exam hi buatsaih ṭan a ni - MATA hian tun ṭuma dawng tharte nen hian Black belt 395 a nei tawh.
Home Minister K.Sapdanga chuan black belt hlanna inkhawm hi hmanpuiin, Taekwondo chu Mizoram tihmingṭha fotu leh India tan pawha hlawhtlinna chang ṭhin an nih thu a sawi. Home Minister chuan, sorkar hmalakna Empowering Mizoram Sports (EMS) hnuaia infiamna ngaihpawimawh bik pariat zingah Taekwondo chu a tel thu sawiin, Olympic thlira Mizoram inbuatsaihnaah a tel thu a sawi.