ISL fixture thar a chhuak

India rama club inelna sang ber, Indian Super League fixture phase 2 chu tihchhuah a ni ta a, May 8-ah ISL final chu khelh tura ruahman a ni - phase 2 hi January 22 aṭangin a inṭan dawn a, tuna ISL kalpui mek fixture hi chu season ṭan hmaa puanzar tawh sa kha a ni.

ISL-ah hian team 13-in inelna an hmachhawn a, dan ang chuan club 14 inel tur ni mah se, IFL champion Diamond Harbour an tawp tak avangin club 13-in inelna an hmachhawn. Hetihrual hian Diamond Harbour hi relegate anga chhiar niin, tun season-ah hian relegate a awm lo ang.

Phase 2-ah hian mipui nghahhlelh ber Kolkata derby chu February 28-ah khelh tur a ni dawn a, Mohun Bagan leh East Bengal ten chungnung zawk nih an inchuh dawn - hetihrual hian derby 'hot' zawk beisei tan chuan club pahnih hi an intum hma hret pawh a tih theih.

April thla tawp lamah league round tawp lam khelh chauh tur a ni a, hetiang hun velah hian Kolkata derby khel ta se, playoff khelh phak inchuh boruak san vanglai tak a ni thei - hei vang hian Kolkata derby an khel hma dawn hreta ngaihna a awm pawh hi a awm viau.

ISL-ah hian club 13 awmte hi home & away-in an inkhel kual vek a, an inkhelh kual hnua a sang ber chuan League Winner Shield hlawh chhuakin, Asian football-a India aiawh turin an tling nghal ang.

Mahse, league round-ah hian ISL hi a tawp mai lo a, knockout hmangin ISL Cup champion tur zawn leh ṭhin a ni. League round-a a sang pahnih chuan semifinal an lut nghal a, pathumna aṭanga paruknaten knockout playoff khelin, semifinal lut tur an zawng ve leh ṭhin.

April 24-ah knockout playoff hi khelh ṭan tur niin, semifinal hi double leg-a khelh tur a ni a, April 28 & 29 leh May 2 & 3 ah khelh tur a ni ang a, May 8, Inrinni zan dar 7:30-ah ISL Cup final khelh a ni dawn thung.

ISL hi international break vangin an chawl vang vang a, vawiinah khelh ṭan a ni leh tawh dawn bawk - East Bengal chuan tlai dar 5:00 hian SC Delhi an mikhual ang a, zan dar 7:30-ah Bengaluru leh Mumbai City an inkhel leh bawk ang.