Poch: US enkawl zawhah Manchester pan nghal

TQL Stadium, Cincinnati-ah Nilaini khan Mauricio Pochettino chuan United States player-te a thlah a, US team a enkawl hnuhnun berah Haiti chu Concacaf Nations League quarterfinal second leg-ah 2-0 in an hneh.

Inkhelh zawh hian US manager a nih anga a tihtur angte tiin media a hmachhawn a, hemi zawh hian player-te dressing room-ah a thlah leh a, Poch bakah player ṭhenkhat mittui a tla hial.

Argentine manager hian US tana a match hnuhnung ber thlirletna hun a nei tawh lo a, Pathianniah Anfield an tlawh dawn avangin darkar 96 bawr vel chauh inbuatsaihna hun a nei. TQL Stadium aṭangin airport a pan nghal a, ama puala thlawhtheihna ruahman saah chuangin Eastern time-a zan dar 11:30-ah UK a pan. UK time-ah chuan a chhuah hun hi zing dar 4:30 pelh hret a ni.

Darkar sarih a thlawh hnuin Manchester hi chhunah a thleng a, a hna thar ṭan turin Carrington training ground a pan nghal. Hetah hian Jesus Perez, goalkeeping coach Antonio Jimenez, fitness coach leh a fapa ni bawk Sebastiano Pochettino te nen an inhmu leh chiah. Anni pathum hian ram tana khel ve lo player-te training pui turin Inrinnia US-in Haiti 6-0 a an hneh zawh khan England an pan tawh thung.

Thawhlehni khan United hian training an nei tawh a, Poch hian Nilaini training a la ho hman lo a, nimin aṭang khan training hi a ho ṭan. Chutihrualin a thlen ni hian United chief executive officer Omar Berrada leh director of football Jason Wilcox te nen an hmachhawpte an sawi ho thung.

Poch hian captain leh manager inkar boruak ṭha a ngai pawimawh a, Southampton (Adam Lallana) leh Tottenham Hotspur (Hugo Lloris) a enkawl lai pawhin an inkar boruak a ṭha. Spurs a enkawl ṭantirha captain chu Younes Kaboul a ni a, senior player-te nen an inrawn hnuah Lloris hnenah a captain hna a hlan.

Argentine manager hian Bruno Fernandes aṭangin beisei a nei sang dawn a, hemi vang hian a hranpain an inkawm ang. Fernandes hi Portugal tan a khel a, Wales lakah goal mawi a khung. Chutihrualin Portuguese midfielder hian United-in contract thar an zawrh a hnawl a, a hmalam hun a chiang lo. Poch-a tan hna a tam

dawn hle.