
Kompany a lo kir leh tawh dawn

German champion Bayern Munich coach Vincent Kompany chu a dam leh tawh a, zanina Cologne an mikhual hunah a ho leh thei tawh dawn niin khawthlang chanchinbute chuan an tarlang.
Kum 40 mi Kompany hi October 23 khan training ground-ah nikhaw hre loin a tlu a, damdawi in panpui nghal niin a thluak leh spinal cord bula tihrawl chu a vung tih hmuh chhuah a ni a, a tlukna lamah a dar a tina tel bawk.
Belgian coach hi enkawl a nih avangin a chawlh a ngai a, match nga chhung a team a kaihruai tawh lo. Kompany awm loh chhungin assistant coach Aaron Danks chuan team kaihhruai hna hi a thawk a, match ngaah vawi li chakpuiin vawi khat an inhnehtawk a, chak loh an nei lo.
Kompany awm loh chhungin Bayern hi buai lo mah se, field sira Head Coach a awm leh chuan player te an inringtawk lehzual dawn a, Bundesliga champion lai hi an hlauhawm leh sawt ang.
Chutihrualin Bayern tan inhliam vangin Manuel Neuer (ke phah), Alphonso Davies, Luis Diaz leh Serge Gnabry (tihrawl) te chu an inlan thei dawn lo. Jonas Urbig, Konrad Laimer leh Josip Stanisic ten an hmun ruak hi an luah khat thei dawn a, Nathaniel Brown chu tlarhma lamah a chhawr theih bawk ang.
Tun season-ah Bayern hian chak loh an la nei lo a, mahse anmahni el pha ber tur Borussia Dortmund chuan an la tlawm bik lo a, an point hmuh zat inang chiahin, goal difference ṭhat vangin Bavarians-in hma an hruai. Kompany hote hian hmahruai fal an duh a nih chuan an chetsual a thiang lo.