Curry tel loin Warriors chak thei lo

Golden State Warriors chu Stephen Curry tel loin an chak thei lo a, nimin zing khan 116-94 in Dallas Mavericks an hneh lo a, tun season-a an vawi sarih chak lohna niin an chak zat (vawi riat) nen a intluk ṭep tawh.

American Airlines Center, Dallas-a inkhelah Mavericks an kal fawr nghal a, Kyrie Irving hoin point 35 zet an hlawh chhuak nghal. Warriors erawh khel chhe lo mah se point score lamah Mavs an tluk lo a, point 10-in an score tlem zawk.

Second quarter-ah pawh Warriors defence khawng deuh mah se point score lamah hma an sawn thei lo a, 62-49 a hnufual chungin chawlhlawk an hmang.

Third quarter-ah pawh Warriors an insiamṭha thei lo a, a hnufual zawkah an ṭang tluan tawh. Hetihlai hian Mavs erawh an khel ṭha chhunzawm a, Cooper Flagg chuan point 33 zet score-in, assist pakua a nei bawk.

Kum 19 mi Flagg hi Irving (17 pts), PJ Washington (21 pts) leh Naji Marshall (12) ten an thlawp ṭha bawk a, Mavs player zingah Moussa Cisse leh Marcus Sasser te chiah point nei lo an awm.

Warriors tan Will Richard chiah point 20 nei tling a awm a, rookie player Yaxel Lendeborg chuan match dang a pha lo a, Brandin Podziemski, Georges Niang leh Charles Bassey te an khel ṭha tawk lo bawk a, an thiampuipa Curry tel loin team dang hlak an ni.

Kum 38 mi Curry hi hliam vangin match thum a chawl tawh a, a awm loh chhungin Warriors an la tlawm vek. A kum tam ve deuh tawh mah se an innghahna ber a la ni a, a team-in an mamawh takzet.

American point guard hi a dulah tha thler a awm avangin a chawl mek a, a lo kir hun tur sawi theih a nih loh avangin Warriors coach Steve Kerr-a'n a tel loa khelh dan a ngaihtuah rih a ngai ang.