Verstappen-a'n Middle East-a intlansiak a thlawp

Red Bull driver Max Verstappen chuan tun season Formula 1 tawpna atana Middle East hman tlang tur chu a thlawp a, F1 hotuten thutlukna dik tak an siamah a ngai.

Kum 29 mi Verstappen chuan, "F1 leh FIA te ka thlawp a, thutlukna dik tak an siamah ka ngai. Middle East-a intlansiak hi ṭha ti lo pawh an awm ang, mahse, kei chu zirchiangtu ka ni lo a, hotuten ruahmanna siam hi ka ring tawk a ni," a ti.

Kumin atana intlansiak hnuhnung tur pahnih Qatar leh Abu Dhabi Grand Prix hi Middle East ram ve ve a ni a, tun season-ah indo buaina avangin April thlaa neih tura tih Saudi Arabian GP leh Bahrain pawh ṭhulh a lo ni tawh. Bahrain GP erawh thla hmasa khan Malaysia-ah neih leh a ni thung.

Hetiang boruak avang hian Qatar leh Abu Dhabi GP pawh hi ṭhulh leh tura duhtu an awm a, mahse F1 leh FIA chuan an ruahman angin an kaltlangpui dawn tih an nemnghet tawh.

November 22, Pathianni zing hian Las Vegas GP neih a ni dawn a, Mercedes driver Andrea Kimi Antonelli champion tawh mah se, Verstappen hian pahnihna dinhmun hauh a tum.

A luahlan tak George Russell leh Ferrari driver Lewis Hamilton bakah Charles Leclerc ten an la um phâk theih avangin Dutch driver tan pahnihna ni chunga season khar turin tha thlah a thiang tawh lo.