Ramhlun SC an chak ve nghal

Mizoram Basketball Association (MBBA) buatsaih MBBA Cup 2026 chu khelh chhunzawm zel a ni a, Nilaini zan khan Ramhlun Sporting Club chuan an match hmasa ber khelin 59-51 in Chhinga Veng Basketball Club an hneh nghal.

RSC tan veteran player Michael F. Lalawmpuia chu team khaipa ber a ni a, Mizoram Super League-a tawnhriat lo nei tawh Lawmsangzuala'n (SP-a) innghahna tlak a nihzia a tilang bawk.

Chhinga Veng erawh an vawi hnih chak lohna a ni a, first quarter-ah che ṭha ṭhin mah se an inthlahdah ṭhin avangin a hmawr an bawk fuh thei lo a, knockout round beisei a har tawh ang.

Nimin inkhelah khan Saron Basketball Club chuan D3 BC Kulikawn chu 76-60 in an hneh a, Saron hi an vawi hnih chakna niin, Kulikawn erawh ADBBA Cup 2026 an champion zawh loh hnuah an che fuh thei meuh lo.

MBBA Cup hi vawiinah khelh chhunzawm leh nghal tur a ni a, champion tura rinkai zinga mi Zemabawk BC leh Zarkawt BCA te an inlan leh dawn avangin ngaihven a hlawh leh ang.

Inelna hi Chawnpui Sports Complex-ah neih a ni a, a hmuna inkhel en man a awm lo. MBBA YouTube channel-ah live-a pek chhuah a ni bawk. November 21, Inrinni thleng Chawnpuiah hian khelh a ni dawn a, November 23, Thawhṭanni aṭangin Hawla Indoor Stadium Republic Vengthlangah khelh a ni tawh ang.