
Mizo club Chanmari FC an chak zawn

Indian Football League-ah Chanmari FC-in nimin khan Jaipur-ah Rajasthan 4-1 in an hneh. MPL champion hian khualmualah match thum khel tawhin chak loh an la nei lo a, point sarih hmuin pathumnaah an invawrhchho.
Vidyadhar Nagar Stadium-a inkhelah Mizo club-in bul an ṭan ṭha a; MPL best player Lalthanzuala bakah Brazilian midfielder pahnih Denilson leh Gabriel Ferreira ten goal an khung a, Rajasthan defender Pardeep Singh-in an lamah a tilut bawk.
Bul ṭan ṭha
MPL champion hian minute 10 chhung lekin goal hnih an khung. Minute rukna lekah Lunglei tlangval TZ-a'n huaisen takin goal-ah a pet a, RUFC defender Pardeep Singh-in dang perin a goal nghal. Mizo club an che ṭha chhunzawm a, minute kuanaah Gabriel-a'n corner kick aṭangin goal-ah a pet lut nghal bawk.
Chanmari FC-in bul ṭan ṭha a, vanneih ṭum ni se penalty hlawh chhuak leh nghal tur an ni. Box chhungah Rajasthan goalkeeper Lalmuansanga'n Chanmari midfieder Gabriel ti tlu mah se penalty pek an ni lo.
Rajasthan an vannei a, insiamṭhatna hun an neih phah. Mualneitu lam hian minute 35-naah Sabir Isah Musa hmangin siphurh an sut a, Rajasthan striker hian a sanna hmang ṭangkaiin a tauh lut ṭha hle.
TZ-a leh T. Mawia
Chanmari second half-ah pawh bul an ṭan a, minute 57-naah Gabriel-a'n box pawn aṭangin goal-ah petin crossbar a per hnuah goal line chhungah a sawt lut a, referee-in goal-ah a pawmsak. Mizo club-in 3-1 in hma an hruai a, dinhmun a ṭha hle.
Rajasthan lam an beidawng lo a, penalty an hlawh chhuak leh nghal. MPL13 final-a penalty shootout-a Chanmari chakpuitu T. Mawia'n Rajasthan striker Musa penalty pet a dansak.
Nigerian striker Musa hian chance ṭha dang pawh a nei a, T. Mawia'n a chance ṭha neih hmasak dansakin a vawi hnihna erawh a pet out. College Veng goalkeeper T. Mawia hian box pawn aṭanga Lunkim Khongsai ball pet ṭha takin a dang.
Hun tawp hmain Dempo laka chakna goal khungtu TZ-a a rawn lang leh a, MPL best player hian chak nemnghehna goal a khung. Mizo club hian November 24, Thawhlehni hian Sreenidi Deccan an tlawh ang a; December 1, Thawhlehni hian RG Stadium-ah Mohammedan SC an mikhual ang.