Chelsea-in January-ah chet nat tum

Premier League club Chelsea chuan January transfer-ah Barcelona run an tum niin Spanish media-te chuan an tarlang a, Blues hian Catalan club player Fermin Lopez leh Jules Kounde lakchhuah nan euro maktaduai 180 an theh chhuak dawn niin an sawi!

Kum 23 mi Fermín López lamah hian Xabi Alonso team hian an mit an len lehzual nia sawi a ni a, mahse, Spanish midfielder hi Barcelona hian chhuahtir an phal kher ang em, tih chu zawhna a ni.

Lopez hian season duhawm tak a hmang mek a, tun season-ah Barca tan inelna hrang hrangah match 15 khel tawhin, goal riat a khung a, assist vawi sarih a nei bawk - Hansi Flick-a tan chhuahtir a harsa dawn.

Mahse, Blues hian Fermin Lopez manah €120mtd an phal nia sawi a ni a, sum lama pa chhe tak Catalan club hian an hnar phal kher ang em, tih chu zawhna chhan harsa tak a ni.

Hetihlai hian Alonso-a'n Kounde lakluh a duh viau nia sawi a ni a, French defender manah hian €60mtd an inruahman. Kounde hian tun season-ah match riat khelin, goal khat leh assist vawi khat a nei a, Hansi Flick-a hnuaiah player pawimawh a ni phak lo - London club a zawmna chance a sang.

Chelsea hian coach thar Xabi Alonso hnuaiah beisei ang result an nei thei rih lo. An league match hnuhnung berah pawh rin loh takin Sunderland chu 1-0 in an ngam lo a, table-ah pangana an ni mek.

Zanin dar 8:30-ah Leeds United an mikhual dawn a, pakuana Leeds lakah hian an tlawm a nih chuan mikhual team hian an tlanpel zui ang.