
Arjuna Awardee Remsiami'n goal a khung
India hockey star Lalremsiami Hmarin Arjuna Award a dawn hnua competitive match a khelh hmasak berah goal a khung nghal. India-in Bhopal-ah Women’s Asian Champions Trophy 2026 an thleng a, Nilaini zan khan match hmasa berah Malaysia hmachhawnin 4-1 i nan hneh. Mizo nula Remsiami hian goal lina a khung a, Kanghmun South nula Lalthantluangi'n inkhel bul a ṭan bawk.
International Sports Complex, Nathu Barkheda-ah India chungnung nghal mah se Malaysia zawkin goal an khung hmasa a, Nuramirah Zulkifli-i'n minute 19-naah a khung. India-in minute khat pawh tling loah Mumtaz Khan hmangin an sut nghal a, Salima Tete (35’) leh ram tana vawi khat khelhnaa player of the match-a thlan Puja Sahoo (39’) ten an khung belh. A tawp khar nan Kolasib nula Remsiami'n minute 49-naah a khung.
Remsiami chuan, "Duh ang takin bul chu kan ṭan ṭha lo a, kan chance neih ang kan hloh bawk. Striker-in pressure kan pek tel avangin hun awl kan nei thei lo. Mahse, quarter 3-na leh 4-naah pressure pek dan kan thlak a, ball kan chang tam a, kan chhuhsak hnem a, kan khel pawh a ṭha tawh hle," tiin Vanglaini a hrilh. Kanghmun South nula Tluangi pawhin, "Malaysia lakah goal kan chhuah a, kan khelh leh turah chuan clean sheet ngei a ṭul a ni," tiin a sawi ve bawk.
Zanin dar 7:00 hian India-in South Korea an hmachhawn dawn a, inkhel hi Star Sports leh Hotstar aṭangin a en theih ang. South Korea hian an match hmasa berah Japan 1-0 in an hneh lo a, inkhel dangah China-in Thailand 7-0 in an sawp. Inelnaah hian ram paruk telin a sang paliin semifinal an khel ang.