Deco-a'n Araujo hralh pawi ti lo

Barcelona sporting director Deco chuan an defender Ronald Araujo chu chhuahtir mai an hreh lo a, loan-a a khelh mekna Liverpool chuan an lei duh a nih chuan kawng a inhawn thu a sawi.

An duhsak

Kum 49 mi Deco chuan, "Barca tana ṭha ber duhin hna kan thawk a, squad ṭha ber nei theih hi kan duhthusam a ni. Chutihrualin mihring kan nih avangin inlaichinna ṭha kan duh bawk.

Araujo hi kum reilote liam taah kha club captain pawh a ni hman a, mahse hun harsa tak a tawn avangin a tlahniam tih hai rual a ni lo. Tunah erawh a lo kir leh tawh a, England-ah nuam ti taka a inkhel leh kan hmuh hian kan hlim a ni.

A thil tawn tawhte thlir letin hlim taka a awm leh hi hmuh nuam kan ti a, career hlawhtling nei se kan duh a, Reds-ah awm chhunzawm zel a duh a nih chuan a duhthlanna kan zahsak ang. He thil hi pawisa vang chauha sawi ka ni lo, a hlimna hi kan ngaih pawimawh ber vang a ni," a ti

A inṭan dan

Kum 27 mi Araujo hian nikum November khan Champions League-a Chelsea nen an inhmachhawn ṭumi red card a hmu a, hei thil vang hian social media aṭangin beih a tawk nasa a, thaha vauna hial a tawk.

Hemi hnu hian a rilru lamah harsatna a tawh chhunzawm avangin chawlh lak an phalsak hial a, rilru lam doctor panin thla khat chuang chawlh a la. Hemi hnu hian Spanish champion tan inlan lehin ngai a awh tawh lo thung.

Kumin World Cup khelh zawh takah khan koh zingah a tel ve a, mahse a chawn tha a tihnat avangin match khat pawh a khel ve lo a, an ramin group stage an paltlang lo bawk.

Engtin zel?

Kumin nipui lai khan Araujo hian loan-in Liverpool a pan a, a lakah beisei a sang lo. Mahse a thawhrim leh beidawn duh loh rah a hmu a, Andoni Iraola hnuaiah match 15 zet a khel tawh a, goal hnih khugn tawh bawkin Reds fans-in an ngaina tawh hle.

Liverpool hian Barca nen an inremnaah Uruguayan defender hi pound maktuaduai 47-a lak ngheh theih dan an nei a, Catalan club hotute lamin a chhuah an phalsak avangin Anfield-ah a awm nghet a nih pawhin thil mak a ni lo ang.

Araujo tel loin Barca an buai lo a, La Liga hmahruaitu ni mekin tun season inelna hrang hrangah chak loh vawi hnih chiah an la nei. Zaninah Villarreal an mikhual dawn a, international break hnua an match hmasa ber tur a ni.