Chevalier-a'n PSG chhuahsan duh

Paris St-Germain keeper Lucas Chevalier chuan hmun a chan loh avangin chhuah a duh a, French keeper hian nakkum January transfer inhawn hunah club dang zawn a tum.

Kum 25 mi Chevalier hian mikum nipui lai khan Lille aṭangin PSG hi pound maktaduai 34-in a zawm a, Manchester City pantu Gianluigi Donnarumma hmun ruak luah khat tura ngaih a ni.

Mahse a beisei angin thil a kal lo a, second choice keeper Matvey Safonov-a'n a nek chhuah a, a zawna Champions League vawi hnih an champion-naah match khat pawh a khel ve lo.

Chevalier hi kumin World Cup khelh zawh takah khan France tan koh zingah a tel pha lo a, season tharah beiseina sang tak nei mah se Safonov-a thachhang dawltu bak a ni phak loh avangin chhuah a duh.

Chhuah a duh thu a lan rualin Chevalier hian ngaihventu a nei nghal a, Juventus leh Tottenham Hotspur bakah Barcelona hming pawh lam rik a ni. Mahse amah berin khelhna hmun a chan theihna tur pan a duh dawn avangin club lian a zawm kher a rinawm loh.

PSG hian zanin dar 9:45 hian Nice an tlawh dawn a, Chevalier aia Russian keeper Safonov a khelh leh ngei a beiseiawm. Luis Enrique hote hian season bul ṭan fuh tawk lo mah se an insiamṭha leh tawh a, table-ah point 23 hmuin hmahruaitu an ni leh tawh a ni.