
Martinez-a'n training a zawm

Italian champion Inter Milan forward Lautaro Martinez chuan training a zawm leh tawh a, Pathianni zan dar 1:15-a Atalanta an tlawh hunah chhawr theih a ni tawh dawn niin khawthlang chanchinbuten an ziak.
Kum 29 mi Martinez hi thla hmasaa Club Brugge nen Champions League-a an inhmachhawn ṭumin a mal vei lamah hliam a tuar a, a hliam hi endik a nih hnuah thla khat chhung a chawlh a ngaih avangin, hemi hnu hian a inkhel leh tawh lo.
Argentine forward awm loh chhungin Inter hian match sarih an khel hman a, tlarhmaah Marcus Thuram leh Pio Esposito te khel chhe lo mah se an hmelma AC Milan an hneh lo a, fans-in Martinez hi awm se result a danglam theih an beisei.
Tun season-ah Martinez hian Serie-ah match nga chiah a la khel a, mahse goal li a khung tawh. Match sarih khel thei lo mah se Inter tan Thuram (goal ruk) chauh chu ani aia khung hnem a awm.
Hetihlai hian an striker Ange-Yoan Bonny chuan a malpuiah tho hliam a nei a, Atalanta lakah a inlan theih dawn loh avangin Martinez lo kir a pawimawh dawn a, bul a ṭan lo a nih pawhin Cristian Chivu-a'n a luhtir ngei a rinawm.