Saron BC-in quarterfinal an lut

Mizoram Basketball Association (MBBA) buatsaih MBBA Cup 2026 chu nimin khan khelh chhunzawm a ni a, Saron Basketball Club chuan 85-76 in Mission Vengthlang Basketball Club lakah hnehna changin quarterfinal an lut.

First quarter-ah Mission Vengthlangin 24-21 in hma an hruai a, ADBBA Cup khelh zawh taka MVP Emanuel Lalpekhlua a khelh ṭhat avangin Mizoram Super League club hneh thei turin beiseina sang tak an nei hman.

Mahse second quarter aṭangin Saron an insiamṭha leh nghal a, K. Liandinga leh Lalmalsawma hoin hma an hruai let a, Sihphir tlangval palian laldinsanga an hman thiam bawk avangin a tawp thlengin an inthlahdah tawh lo.

Saron hian MSVT bakah an group-a an awmpui Chaltlang BC leh D3 BC Kulikawn te an hnek vek a, quarterfinal-ah club dang tan zuam sual theih an ni dawn.

Ningani zan inkhelah Khatla TBL chuan 90-50 in Tuikual South an hneh a, MSL champion lai hi an vawi hnih chakna niin TKS lakah point 40 zeta inthlau chunga an chak avangin an tan quarterfinal a hnai tawh.

MBBA Cup hi vawiinah khelh chhunzawm leh tur a ni a, MSL club Zemabawk BC, Zarkawt BCA leh Chaltlang te an inlan dawn bakah hmeichhe inkhel pahnih a awm dawn bawk.

Inelna hi Chawnpui Sports Complex-ah khelh a ni a, a hmuna inkhel en man a awm lo, MBBA YouTube channel-ah live-a pek chhuah a ni bawk. Novermber 23, thawhṭanni zan aṭangin Hawla Indoor Stadium, Republic Vengthlangah khelh a ni

tawh ang.