
Practice-ah Russell tlan chak ber
Pathianni zinga neih tur Las Vegas Grand Prix atana inbuatsaihna chu nimin khan neih a ni a, Mercedes driver George Russell chu pakhatna a ni a, intlansiak pangngaia pakhatna ni turin beisei a nei sang sawt ang.
Russell-a dawtah hian Pierre Gasly a thleng a, Alpine driver hian Russell a phak lohna hi second khat pawh a tling lo. Ferrari driver Charles Leclerc chu pathumna a ni ve bawk a, Russell-a teammate Antonelli erawh pariatna daih a ni thung.
Las Vegas GP practice-ah hian ruah a sur nasa a, kawng a nâl avangin driver tam takin harsatna an tawk a, driver hming langsar zawkin beisei an phak loh chhan a ni.
British driver Russell chuan, "Track a huh tawh chuan lap tin hi a danglam ṭhin a, chuvangin vawiinah pawh kan tlan chak tawk lo. Mahse kawng nâlah pawh McLaren leh Ferrari an chak hle," a ti.
Kum 28 mi Russell hi tun hnaiah Max Verstappen-a'n lehpelin driver's table-ah pathumnaah a tla tawh a, a teammate Andrea Kimi Antonelli champion tawh laia tlak hniam reng a duh bik lo a, intlansiak pathum hmabakah point tam thei ang ber hlawh chhuah a tum ang.