Krismas leh kumthar vuakvetah United an hlim

Manchester United-in manager lailawk Ole Gunnar Solskjaer hnuaiah match li khelin an chak vek a, Jose Mourinho thlaktu Norwegian manager hnuaiah Old Trafford boruak chu a ṭha zawngin a danglam a, Krismas leh kumthar vuavketah United an hlim hle.

Kum 45 mi Solskjaer hian a club hlui Cardiff City tlawhin bul a ṭan a, United-in Sir Alex Ferguson awm loh hnua a vawi khat nan league match-ah goal nga a vawi khat nan an khung. Old Trafford-a an match hma berah Huddersfield chu 3-1 in an hneh a, Bournemouth 4-1 in an hneh chhunzawm leh bawk.

Nilaini zan khan St James Park-ah Newcastle United chu 2-0 in an hneh leh a, Solskjaer hi United enkawl tawh zinga league match hmasa palia hnehna chang vek thei pahnihna a ni chiah a, kum 1946-a Sir Matt Busby-a record siam chu a nih rual chiah a ni.

Solskjaer chuan United a enkawl tirhin player-te chu a bul aṭanga an ṭan ṭhat leh vek tur thu a hrilh a, a awm hmaa chetsualna leh hming hliauna nei an awm a nih pawhin a theihngilh sak tur thu a sawi.

Norwegian manager hian Krismas leh kumthar vuakveta match li lai awm chu remchangah hmangin ṭha takin player a siksawi a, FIFA Under 17 World Cup-a England champion puitu zinga mi Angel Gomes pawhin tun season-a a vawi khat nan khelmualah a inlan theih phah bawk.

Mourinho hnuaia United goal difference chu 0 a ni a, Solskjaer hnuaiah goal 14 zet an khung a, match li an khelh zawhah an goal difference chu pakuaah a kai chho. Statistics thlir pawhin ball possession, ball pass zat leh goal-a an ball pet zat thlengin hmasawnna a awm a, United an inpumkhat leh tawh a, team chauh phur thar loin supporter thlengin an phur thar hle.

FIFA World Cup-a France champion puitu Paul Pogba hi player chungchuang ni mah se Jose Mourinho hnuaia league match 14 a khelhah goal thum leh assists vawi thum chauh a nei a, Liverpool laka an mualpho ṭumin bench-ah a ṭhu tluan bawk.

Manager thar Solskjaer-a'n United reserve team-a a enkawl tawh Pogba chu Cardiff nen an inkhelh ṭumin hmun pawimawh a chantir nghal a, Mourinho hnuaia tihtur chin neia midfield-a chhawr ṭhin kha zalenna pek a nih hnuah a theihna tak a rawn par chhuak.

French midfielder hian Solskjaer hnuaia match li a khelh tawh aṭangin goal li a khung tling der tawh a, assists vawi thum a nei der tawh. Pogba hi Mourinho chhuahtirhin 'social media' kaltlangin a che mawi lo tia sawi awm mah se a chet ṭhat hnuah, "Jose hoin nomawi kan chawi a, ka puitlin phah a, a chungah hian ka lawm takzet a ni," tiin a sawi thung.

Jose Mourinho hnuaiah United tlarhmain sawisel an hlawh a, Romelu Lukaku chu sawisel nasat ber zinga mi a ni. Belgian striker hi chawlh hahdamtir a nih hnuah Bournemouth nen a rawn kir a, goal khat a rawn khung nghal.

Newcastle an hmachhawn ṭum pawhin Lukaku hian bench aṭangin bul ṭan mah se a luh aṭanga second 38-na lekah leh a ball vawi khat khawihnaah hmahruaina goal a khung nghal. Hemi ṭum hian beisei phak lo Alexis Sanchez pawh Solskjaer-a hnuaia a vawi khat nan a in lar a, Chilean forward hian ṭha zetin Rashford-a goal khung tur a siam sak.

Hmabak nei êng Marcus Rashford leh Anthony Martial te pawhin hmun pawimawh changin English forward hian match liah goal thum khungin French forward hian goal a khung tawh bawk.

United khingpui Cardiff City, Huddersfield, Bournemouth leh New-castle United hi 10-na hnuai veka awm an nih avangin Solskjaer hnuaiah fiahna tak tak an la hmachhawn lo niin a lang.

Manchester United hian kartawp hian FA Cup-ah Reading an hmachhawn dawn a, hemi zawh hian champion beiseiawm zinga mi Tottenham Hotspur an hmachhawn dawn a, London club hi fiahna tak tak hmasa ber a ni ang.

December 22, Inrinni

Cardiff City 1 - 5 Manchester United

CAR : Victor Camarasa 38' (P)

MUTD : Marcus Rashford 3'; Ander Herrera 29'; Anthony Martial 41'; Jesse Lingard 57' (P), 90'

December 26, Nilaini

Manchester United 3 - 1 Huddersfield

MUTD : Nemanja Matic 28'; Paul Pogba 64', 78'

HUD : Mathias Jorgensen 88'

December 30, Pathianni

Manchester United 4 - 1 Bournemouth

MUTD : Paul Pogba 5', 33'; Marcus Rashford 45'; Romelu Lukaku 72'

BOU : Nathan Ake 45+2'

January 2, Nilaini Zan

Newcastle 0 - 2 Manchester United

MUTD : Romelu Lukaku 64'; Marcus Rashford 80'

Manchester United hian Ole Gunnar Solskjaer hi Norwegian club Molde aṭangin an hawh a, May thlaa let leh tur a ni. Hemi chungchang zawhna chhangin Solskjaer chuan, "United chhuahsan hi ka duh tawh lo a ni," tiin enkawl chhunzawm a duh thu a sawi.

United manager hlui Sir Alex Ferguson pawhin thluaka thisen zam chat vanga a damloh hnua a vawi khat nan club training ground Carrington chtu December 29 khan a tlawh. David Moyes leh Louis van Gaal te hunlai khan vawi khat mah Ferguson hian United training a tlawh lo a, Jose Mourinho erawhin an training tlawh turin a sawm thung.

Solskjaer chuan, "Training ground a rawn tlawh chhungin nuam a ti em em a, coaching staff pawh min titi puiin min rawn fuih a ni," tiin a hlawkpui thu a sawi.