Australia-ah India din-hmun a ṭha

Cheteshwar Pujara chuan India leh Australia ten test match an khelh mekah nimin khan a vawi thum nan century a siam a, Men in Blue hian 2-1 a hma hruai mekin series la thei turin an dinhmun a ṭha hle.

India hian test match hmasa ber an lak hnuin Australia-in second test-ah an hneh let a, third test hi December 26-30 inkar khan Melbourne Cricket Ground-ah khelh niin India hi 137 runs in an chak.

Nimin khan test match hnuhnung ber fourth test chu Sydney Cricket Ground-ah khelh ṭan a ni a, Cheteshwar Pujara chuan thi loin run 130 a vaw chhuak a, ni khatnaah hian India hian wicket li hlohin run 303 an vaw chhuak. 

India hian Australia ramah test series an la la ngai lo a, Virat Kohli captain hnuaiah sulhnu ropui tak hnutchhiah theihna hun remchang an nei. Fourth test hi nimin 

aṭang khan ṭan a ni a, January 7 thleng a awh ang.

Kum 30 mi Pujara hian test match hmasa berah 71 leh 123 a siam a, test match vawi hnihnaah erawh innings pahnihah run 28 chauh siamin India team an chak zo lo. Third test-ah innings hmasa zawkah duck out mah se second innings-ah run 106 a vaw chhuak. Fourth test-ah Pujara-a'n century a siam a, mikhual team-in hnehna chang turin hmabak a nei êng hle.