Group khatah Chhinga Veng leh Mohammedan

Mizoram Premier League finalist Chhinga Veng chuan I League Second Division an khel dawn a, Kolkata club ṭha Mohammedan S.C. nen group khatah an awm kawp.

Mizo club hi Group C-ah Mohammedan bakah New Barrackpore Rainbow FC, Trau FC, Jamshedpur FC (reserves) leh ATK (reserves) te nen an awm ho a, group khat aṭangin team pakhatin final round an lut dawn. ISL reserves tan final round a luh theih loh thung.

Chhinga Veng hian coach Lalsangzuala Hmar hoin ṭha takin Krismas leh kumthar vuakvetah pawh training an nei a, match hmasa berah January 14 hian New Barrackpore nen Barasat Stadium-ah an inhmachhawn ang.

Chhingcows hian January 8 hian inelna hmachhawn turin Kolkata an pan ang. Lonestar Kashmir FC, Hindustan FC, ARA FC, FC Goa (r) leh Bengaluru FC (r) te chu group A-ah an dah khawm a, group B-ah Fateh Hyderabad, Ozone FA, South United, Kerala Blasters (r) leh Chennaiyin FC (r) te an awm bawk.