India tlangval a tla

India rama tennis inelna ngaihhlut ber ni chho mek Tata Open Maharashtra-ah India player chhuanvawr Ramkumar Ramanathan chu last 16 paltlang zo loin a tla.

Nilainia inkhelah Ramanathan hi world number 45 Malek Jaziri lakah 7-6(6), 6-7, 3-6 in a chak lo. Player pahnih an inkhel tawk a, darkar hnih leh minute 46 an inkhelh hnuah tawnhriat nei tlem zawk India tlangval hi a chak lo zawkah a ṭang.

Inkhel dangah seeded pahnihna Hyeon Chung chu a chak lo a, hetihlai hian seeded pakhatna Kevin Anderson leh Gilles Simon te erawhin hnehna an chang thung.

World number 25 mi Chung hian set hmasa berah 4-0 ngawtin hma hruai hman mah se Latvian tlangval Ernests Gulbis chuan 7-6 (2), 6-2 in a hneh let thei. South Korean player beiseiawm Chung hian season hmasa khan Australian Open quarterfinal a thleng hial a, kuminah erawh beisei anga ṭhain season bul a ṭan thei rih lo.

India rama rawn kal player langsar dang Anderson chuan 7-6 (2), 7-6 (6) in Serbian tlangval Laslo Djere a hneh a, hnehna chang tur hian darkar hnih leh minute riat a mamawh. South African star hian a match lehpekah chuan Simone Bolleli hnehtu Jaume Munar a hmachhawn leh ang, Munar hi seeded pasarihna a ni thei a, Anderson tan hna a awlsam dawn lo.