Asian Cup khel tur Jeje

Inrinni zan aṭangin Asia khawmualpuia ram leh ram football hmanga an inelna sang ber Asian Cup chu khelh ṭan a ni dawn a, kum 2011 hnua a vawi khat nana inlan tur India team-ah Mizo tlangval Jeje Lalpekhlua a tel. 

Chennaiyin striker Jeje chiah hi India team-a Mizo tel awmchhun a ni a, Lalruatthara leh Lallianzuala Chhangte chu player 28 zingah tel mah se 23 zingah erawh an tel phak ta lo a, Jerry Lalrinzuala chu hliam vangin squad aṭanga a inhnuhdawh a ngai bawk. 

India coach Stephen Constantine chuan, "Asian Cup khelh dawn ruaia squad siksawi vak chu ka tan 'risk' a sang mah mah a ni," tiin hun rei tak chhung a hnuaia lo khel tawh player-te a 'duhsak' thu a pha lo. 

India hi inelna thlengtu United Arab Emirates nen Group A-ah an awmho a, UAE bakah hian Thailand leh Bahrain awm bawkin Asian football-a team langsar tia chhal ngam vek an ni a, India tan a harsa dawn. 

Blue Tigers tia hminglem an pek India hian Pathianni zanah Thailand hmachhawnin an match hmasa ber an khel ang a, January 10-ah UAE nen inkhelin January 14-ah Bahrain nen an inkhel leh bawk ang. 

India hian December 27 khan Oman nen friendly match an khel a, goal khung loin Asian team ṭha nen hian an inhnehtawk. 

Goalkeepers: Gurpreet Singh Sandhu (Bengaluru), Amrinder Singh (Mumbai City), Vishal Kaith (Pune City).

Defenders: Pritam Kotal (ATK), Sarthak Golui (Pune City), Sandesh Jhingan (Kerala Blasters), Anas Edathodika (Kerala Blasters), Salam Ranjan Singh (East Bengal), Subhasish Bose (Mumbai City), Narayan Das (Delhi Dynamos);

Midfielders: Udanta Singh (Bengaluru), Rowllin Borges (NorthEast United), Anirudh Thapa (Chennaiyin), Vinit Rai (Delhi Dynamos), Halicharan Narzary (Kerala Blasters), Ashique Kuruniyan (Pune City), Germanpreet Singh (Chennaiyin), Jackichand Singh (Goa), Pronay Halder (ATK).

Forwards: Sunil Chhetri (Bengaluru), Jeje Lalpekhlua (Chennaiyin), Sumeet Passi (Jamshedpur), Balwant Singh (ATK).