Duhthusama kum bul ṭantu Tottenham

Tottenham Hotspur-in Ja­nuary 1-ah an duhthusama ṭha­in kum bul an ṭan a, an mi­khualna ramah Cardiff City chu 3-0 ngawtin an sawp.

Spurs hian December 26 khan Bournemouth chu 5-0 a an sawp avangin table-ah pahnihnaah an invawrhkai hman a, mahse December 29-ah Wolves chu 1-3 in an ngam lo zui. 

Kum thar a herchhuah leh meuh erawh chuan Spurs an insiamṭha chiang hle - harsatna nei loin Cardiff lakah goal thum an khung a, Harry Kane, Christian Eriksen leh Son Heung-min ten goal khat ṭheuh an khung. 

January 2 zan khan Premier League match dang khelh chhun­zawm a ni a, Krismas laia Man­chester City tlawmtu Crystal Palace chuan 2-0 in Wolves an hneh - Jordan Ayew leh Luka Mili­­vojevic (penalty) ten goal khung­in relegation zone an hlat zel.

West Ham leh Brighton te goal hnih ve ve khungin an inhnehtawk a, Burnley FC chuan 2-1 a Huddersfield an hneh laiin Bournemouth leh Watford chu 3-3 in an inhnehtawk bawk.

Tottenham-in Wolves an ngam loh hnu lawkah 3-0 in Cardiff an sawp a, coach Mau­ricio Pochettino chuan an chet ṭhat chhunzawm zel chu thil pawimawh ber a nih thu a sawi. 

Argentine manager chuan, "Premier League nomawi beisei ngam zingah tel kan duh a nih chuan kan khelh ṭhat kan chhunzawm zel a ṭul a ni. Inrintawkna kan neih a ngai a, thil ropui takin min hmuak mek a ni," a ti a, a phur hle. 

Spurs tan Son Heung-min chuan goal khat a khung bak­ah Eriksen tan a assist bawk - chanchin lawmawm lo a awm zui, season duhawm tak hmangtu Son hi Asian Cup khel turin UAE lamah a kal zui. 

Son chuan, "September-ah Asian Games vangin ka inlan tawh lo a, kalbo a ngai leh ta hi pawi ka ti takzet. Mahse, Spurs-in min mamawh tluk zetin ka ramin min mamawh si a ni," tiin South Korea squad a zawm hmain a sawi. 

Season hmasa Premier League-ah Burnley-in pasarih­na dinhmun an luah a, Europa League qualifier hial an khel - mahse hei hi tun season-ah an tuar a, an squad a chhah bawk si loh avangin Premier League-ah an talbuai zui. 

Mahse, relegation zone-a an awm reng hnuin Burnley hian table mawngphah luahtu Huddersfield chu 2-1 a hnehin 16-naah an invawrhkai. Mual­neitu Huddersfield tan Steve Mounie chuan minute 33-naah goal hmahruai khung mah se Chris Wood chuan minute 40-naah si phurh a sut. 

Huddersfield defender Chris­topher Schindler hnawh­chhuah zui a ni a, Ashley Barnes chuan Burnley chakna goal minute 74-naah a khung. Burnley player Robbie Bra­dy chu minute 90-naah hnawh­­­chhuah ni ve mah se Hud­dersfield tan chhawr ṭang­kaina hun a awm tawh lo. 

Burnley hian December 30 khan West Ham chu 2-0 a an lo hneh tawh avangin a zawnin league-ah an chak ve ta a, September hnua league-a an chak zawn leh hmasak ber a ni. 

Bournemouth leh Watford inkhelah goal ruk ngawt a lut a, team pahnih hi 3-3 a inhneh­tawkin a chak zawk an awm lo - goal hi first half-a lut vek a ni!

Watford tan captain Troy Deeney chuan minute 27 chhungin goal hnih a khung hman a, mahse Cherries lam hian minute 34 leh 37-naah Nathan Ake leh Callum Wilson hmangin an si phurh an sut zui - an hlim chhung erawh a rei lo.

Watford tan Ken Sema chuan minute 38-naah hmahruaina goal a khung leh a, hei pawhin rei a daih chuang lo. Khel ṭha tak Ryan Fraser chuan minute hnih hnuah si phurh a sut ve leh a, goal dang lut awm loin an inṭhen.

Watford captain Troy Dee­ney chuan, "Team intum tawk tak kan ni a, 6-6 in tawp pawh ni se a mak lo ang. Team pahnih defending kha chu Sunday League ang mai a ni," tiin tlarhnung pherh thu a sawi. 

West Ham-in Brighton & Hove Albion an mikhualna inkhelah hnehna chan inbeisei mah se 2-2 in an inhnehtawk hram a, minute 60 hnu lama Marko Arnautovic goal hnih khung zarah an mualpho lo. 

Brighton tan Dale Stephens chuan minute 56-naah goal hmahruai khungin minute hnih hnuah Shane Duffy chuan a chhunzawm ve leh bawk a, Burnley laka tlawm hlim Hammers an mualpho nawn dawn niin a lang. 

Mahse, Marko Arnautovic chuan an fan-te lunghnur lutuk tur tihreh nan minute 66 leh 68-naah goal a rawn khung a, goal dang erawh lut loin point an insem. 

West Ham boss Manuel Pellegrini chuan, "Ka lungawi lo takzet a ni. Brighton hian goal khung nana an hman ber chu set piece a ni a, an thiam dan tak hmangin kan khungtir a ni," tiin a lawm lo hle.