VAR vangin Juve an chak

Italian Serie A-ah thlasik chawlh an hmang mek a, January 19-ah an khel zui leh chauh ang. December 29 khan season chanve hma lama an match hnuhnung ber an khel a, champion lai Juventus chuan video assistant referee (VAR) puihna zarah hnehna an chang hram.

Juve hian an mikhual Sampdoria 2-1 in an hneh a, Turin club goal pahnih hi Cristiano Ronaldo khung ve ve a ni. Real Madrid forward hlui hian minute hnihna leka goal hmahruai a khung bakah second half-ah penalty aṭangin chakna goal a khung.

Juventus chauh hi VAR hmang ṭangkai an ni bik lo, striker Fabio Quagliarella-a'n a club hlui lakah VAR hmang an penalty hmuh a khung a, an siphurh a sut. Mahse, Juve hian VAR hmang bawkin penalty an hmuh chu Ronaldo-a'n a khung ve leh a, hun tawp dawna Sampdoria goal khung chu VAR hmangin offside a ni tih hmuh chhuah a ni bawk.

Massimiliano Allegri naute hian tun season Serie A match 19 an khelh tawh chinah chak loh an la nei lo, point 53 hmuin a zawna a vawi riat nan an champion leh ngei a rinawm tawh hle - pahnihna Napoli aiin point 11 zetin an sang fal leh hman tawh a ni.