Mayweather hmaah Nasukawa a tlawm

December 31 khan boxer ropui Floyd Mayweather chuan kickboxing khawvela hming langsar Tenshin Na­sukawa chu round khatnaah a hneh a, mahse he inhnek hi 'exhibition match' a nih avangin fighter pahnih record-ah telh a ni lo. 

Japan-a fighter pahnih inhmachhawn hi round khatah minute thum zel khelin round thum khelh tura ruahman a ni a, mahse Japanese fighter Tenshin hian round khat pawh a paltlang zo ta lo a ni. 

Kum 41 mi Mayweather chuan, "Midang tih hlim kha kan tum ber chu a ni a, hun hlimawm tak kan hmang a ni," a ti a, exhibition match mai a nihzia sawi nawnin, "Min hnehtu ka la tawng lo a, chutiang bawkin Tenshin hian hnehtu a la nei lo. Champion dik tak leh fighter ropui tak a ni," a ti. 

Judge pawh awm loa fighter pahnih inhmachhawn hi boxing khawvela hming langsar tak takin an sawisel a, Mayweather erawhin dollar maktaduai kua a hlawh phah thung.

Fighter pahnih inhma­chhawn hian Tenshin hi a 'ke' hman phal a nih loh thu hrilh a ni a, Mayweather hi a pet lui a nih chuan dollar maktaduai nga a chawi tur thu an hrilh!