Australian Open khel lo tur Del Potro

Tennis world number 5 Juan Martin del Potro chu January 14 aṭanga khelh tur Australian Open-ah a inlan thei dawn lo. Argentine tlang­­val hi a khup hliam a la dam loh avangin season thara Grand Slam hmasa ber hi a khelh theih loh phah dawn a ni.

Kum 30 mi Del Potro hi nikum October thla khan Sanghai Masteres-ah a inlan a, mahse China rama inelna lianah hian hliam a tawrh avangin a inlan tluan thei lo. Season chawlh laiin a dam hman beisei ni mah se, rin angin a dam chak ta lo.

Grand Slam vawi khat cham­pion tawh Del Potro chuan, "Zawimuangin hma kan sawn ve zel a, dam lam ka pan zel. Engtik niah nge ka inkhelh leh theih dawn tih erawh tun dinhmunah ka la sawi thei rih lo," tiin a sawi.

Del Potro hi player ṭha leh theihna nei sang tak ni mah se hliam a nei ngun a, hei vang hian a ropui tur angin a khel chhuak thei tawk lo nia ngaih a ni. A banrek hliam vawi thum ngawt zai a ni tawh a, hnungzâng na a nei tawh bawk.

Amaherawhchu, season hmasa khan hlawhtling takin a khel thei. Roger Federer hnehin BNP Paribas Open title a la a, March thla khan Indian Wells-ah a champion leh bawk; Wimbledon-ah a thiam pariat zingah a tel phak a, US Open-ah pawh final lutin world number 1 Novak Djokovic a ngam lo thung.