I League-ah MPL champion an che ṭha

Aizawl FC chuan Mizoram Premier League an champion hnua I League match hmasa ber December 29, 2018-ah Gokulam Kerala 3-2 in an hneh. Mizo club hian January 5, Inrinni hian Indian Arrows an hmachhawn lehnghal dawn.

Aizawl FC-in Mizorama inelna sang ber MPL leh I League an khelh kawp avangin an insiamrem thei lo tih an result-ah a lang. Mizo club hian season liam ta I League best coach Gift Raikhan bakah foreigner leh state pawn player te la chungin pakuanaah an awm a, an hnuaiah Indian Arrows leh Shillong Lajong te chauh an awm.

MPL an champion hnuah erawh nomawi vangin inrintawkna thar an nei a, an squad an tichhah bawk. Final-a an hmachhawn Chhinga Veng aṭangin Lalrinchhana an lalut a, MPL best midfielder nominee dang Vanlalthanga chu Chawnpui FC aṭangin an la a, Chanmari FC aṭangin C. Lalrosanga an la bawk.

Aizawl FC hian tlarhnung tihchak nan Ugandan defender Juuko Richard Kassaga an lalut a, Gift Raikhan hian document fel loh avangin foreigner hi Gokulam Kerala nen chhawr thei lo mah se Mizo player ṭha pathum a neih belh avangin team dang an ni tawh hrim hrim.

Gift Raikhan hian Mizo player thar pathum a chhawr nghal vek a, ball pet thiam Thanga chu left back-ah dahin Rosanga chu right back-ah a awm a, Rinchhana chu midfield laiah an chhawr thung. Defence laiah Kareem Omolaja chu hrem vanga an chhawr theih loh avangin Govin Singh leh Hmingthanmawia te an inkawp.

Inkhelh ṭantirh lamah Aizawl FC che ṭha tawk lo mah se an insiamrem vat a, first half-ah goal lut lo chungin inkhel an thunun zawk tawh. Second half-ah Mizo club-in goal an khung ṭan a, minute 51-naah Thanga ball vawrhluh chu Gokulam tlarhnung an inrinthul avangin Ansumana Kromah-a'n goal hmahruai a khung.

Minute 63-naah Rinchhana ball fing tak chu Lalkhawpuimawia'n goal-ah a chantir leh a, minute 70-naah Rosanga ball vawrhluh Rochhara'n mawi zeta la thlain goal mawi a khung leh bawk. Aizawl FC-in rang taka goal thum an khung avangin point thum hlawh chhuak turin harsatna an nei lo.

Aizawl FC an inthlahdah a, injury time-ah Gokulam substitute Joel Sunday chuan siphurh a sut ṭhen a. Minute li hun pek belh chhunga khung len theih tur chiahin Sunday hian a club hlui lamah penalty hmangin goal khat dang a khung belh leh a, goal dang khung belhna turin hun a awm tawh lo.

Inkhelh banah Gift Raikhan chuan, "Hun tawp dawna kan inthlahdah kha thleng nawn tawh lo se a duhawm hle. Goal thum kan khung tawh hnu pawhin fimkhur takin kan khelh a ngai a, inzirna atan hmang ila a duhawm hle," tiin hun tawp dawna player inthlahdah avanga a lungawi loh thu a sawi a, player thar leh goal an chhuah hmaa an khelh danah erawh a lawm thu a sawi thung.

I League champion inum a ngaihnawm chho a, hmahruaitu Chennai City-in match 10 khelh zawhah point 21 an hmu a, an hnuaia awm Neroca leh Real Kashmir ten point thum chauha an phak loh avangin nomawi chawi tur hi a la chiang lo.

Kolkata club lian East Bengal pawhin an club history-a a vawi khat nan I League champion an la inbeisei thei a, Mizo tlangval Lalrindika Ralte, Lalramchullova, R. Laldanmawia leh Brandon VL Remdika te khelhna hian point 16 an hmu tawh a ni.